Tags-Zindagi

paiġhām-e-zindagī hai ḳhushī kī naved hai
mere liye to aap kā dīdār iid hai

maut aanī hai to aa jaa.e kisī din lekin
zindagī bhī kabhī rāhoñ meñ paḌī sābit ho

zindagī kā mazā nahīñ miltā
but mile to ḳhudā nahīñ miltā

kitne sakūñ se kaaT dī purkhoñ ne zindagī
jo mil gayā nasīb se chup-chāp khā liyā

guzre haiñ zindagī meñ bahut tajrabāt se
lekin 'ashok' jiine kā andāz pā liyā

ye zindagī bhī koī zindagī hai ham-nafaso
sitāra ban ke jale bujh ga.e sharar kī tarah

sameTā zindagī bhar kaalī gorī jeb kī raunaq
Dhalā jab umr kā sūraj to tauba kar liyā tum ne

zindagī ġhamgīn hotī jā rahī hai
aarzū rañgīn hotī jā rahī hai

ai rūh-e-zindagī
ai ḳhudā kī quvvat-e-taḳhlīq

ai rūh-e-zindagī
ai avvalīn raushnī kī abadī lau

ai rūh-e-zindagī
ai ḳhudā kī quvvat-e-iz.hār

kabhī naġhma-e-ġham-e-ārzū kabhī zindagī kī pukār ham
kabhī ḳhāk-e-kūcha-e-yār ham kabhī shahryār-e-bahār ham

tujhe pā sakeñ ki na pā sakeñ koī zindagī kī lagan to hai
ki ḳhushī se kaise ujaaḌ deñ tirī aarzū kā dayār ham

ġham-e-zindagī se shikast kyā rah-e-ārzū meñ qadam baḌhā
tū jo saath ho to badal bhī deñ ye mizāj-e-lail-o-nahār ham

kabhī paas aa ke nigāh kar hai ye zindagī tirā aa.ina
tirā ruup ham tirā pyaar ham tirī aarzū kā siñgār ham

suḳhan meñ sahl nahīñ jaañ nikāl kar rakhnā
ye zindagī hai hamārī sambhāl kar rakhnā

maiñ apne aap ko kin rāstoñ meñ bhuul aayā
ki zindagī ne bhī merā surāġh paayā nahīñ

dard-e-ulfat zindagī ke vāste iksīr hai
ḳhaak ke putle isī jauhar se insāñ ho ga.e

ye raah be-kanār be-panāh ḳhizr kī fuġhāñ
bahut milī thī zindagī magar milī zarā bahut

apnā ma.āl-e-zindagī phūloñ ko dekh kar samajh
aaj ḳhizāñ-nasīb haiñ kal jo khile bahār meñ