Tags-Zindagi

ye zindagī hai har ik pairahan meñ sajtī hai
nahīñ thī jiit nasīboñ meñ hārne aate

rah-e-ishq meñ ġham-e-zindagī kī bhī zindagī safarī rahī
kabhī nazr-e-ḳhāk-e-safar rahī kabhī motiyoñ se bharī rahī

maut bhī bas meñ nahīñ hai tire majbūroñ kī
zindagī meñ koī ilzām to lene dete

āzurda-e-ulfat ko ġham-e-zindagī jaise
tapte hue jañgal meñ koī aag lagā de

zindagī vaqt ke safhoñ meñ nihāñ hai sāhab
ye ġhazal sirf kitāboñ meñ nahīñ miltī hai

vo husn-e-be-iltifāt ai 'tājvar' huā iltifāt-farmā
to zindagī ab sunā rahī hai ki umr-e-be-etibār huuñ maiñ

zindagī hai ik kirā.e kī ḳhushī
sūkhte tālāb kā paanī huuñ maiñ

ajnabī ban ke hañsā kartī hai
zindagī kis se vafā kartī hai

vo maut hī hai jo detī hai sau tarah ke libās
ye zindagī hai ki jo be-libās lagtī hai

kahīñ par zindagī kā nām-e-nāmī mauj-mastī hai
kahīñ par ādamiyat zinda rahne ko tarastī hai

jahān-e-zindagī kī qudratī tasvīr haiñ donoñ
kahīñ sūkhā paḌā hai aur kahīñ bārish barastī hai

tirī daulat tujhe kyā faiz pahuñchā.egī tere ba.ad
mayassar zindagī jitnī bhī qīmat par ho sastī hai

zindagī shab ke jazīroñ se udhar DhūñDte haiñ
aañkh meñ ashk jo chamkeñ to sahar DhūñDte haiñ

soch kī lahroñ kā majma.a Thiik hai
zindagī kā mas.ala bārīk hai

zindagī se ham rahe nā-āshnā
saañs go aatī rahī jaatī rahī

bahāna koī to ai zindagī de
ki jiine ke liye majbūr ho jā.ūñ

vo duniyā zindagī ke phuul barsātī huī duniyā
mulā.em nuzhatoñ kī raqs farmātī huī duniyā

ta.alluqāt to mafrūze zindagī ke haiñ
yahāñ na koī hai apnā na ham kisī ke haiñ

ham ko jiinā na aa sakā varna
zindagī jashn ke sivā kyā hai

bas aap kā hī naam hai vird-e-zabāñ huzūr
ye saarī zindagī kā merī iqtibās hai