Tags-Zindagi

jalan āñkhoñ meñ sūkhe lab ġhubār-e-zindagī ruḳh par
thakan kī dāstāñ kahtā hai huliya sar-ba-sar terā

dekho ki dil-jaloñ kī kyā ḳhuub zindagī hai
parvāne jal chuke haiñ aur sham.a jal rahī hai

ai 'prem' zarb-e-sar se zindāñ ko toḌ Daalo
pābandiyoñ kā jiinā bhī koī zindagī hai

aap hī aap haath malte hue
zindagī kā javāz miltā hai

is qadar rañj-o-alam itne masā.ib tauba
zindagī silsila-e-āh-o-bukā hai kyā hai

maiñ zindagī huuñ mujhe is qadar na chaah 'shu.ūr'
musāfirāna iqāmat-guzīñ hai tū mujh meñ

kyā mohabbat vo nasha hai maiñ zarā jānūñ 'nisār'
zindagī meñ is tarah pahle kabhī bahkā na thā

rakkhā hai zindagī ko bhī har haal meñ aziiz
jab ki azāb-e-zīst bhī apne gumāñ meñ ho

maiñ kuchh samajh na sakā merī zindagī ke vo ḳhvāb
in añkhḌiyoñ meñ jo tere the kis shumār meñ the

judā.ī bhī na hotī zindagī bhī sahl ho jaatī
jo ham ik dūsre se mas.ala tabdīl kar lete

zindagī mere liye 'tālib' sazā-e-ishq hai
merī hastī hai mujassam dāstān-e-ārzū

tum mirī zindagī ho ye sach hai
zindagī kā magar bharosā kyā

palaT ke aa.ī hai maqtal meñ zindagī 'rāhat'
faqīh-e-shahr ko ab intizār kis kā hai

ġhanīmat jaan jo din zindagī ke aish meñ guzreñ
kisī kā bhī nahīñ rahtā zamāna ek sā barsoñ

maiñ phir tirī ḳhair apne kaase meñ Daal luuñ ye nahīñ gavāra
ki tere dar se uThī to jo zindagī milī hai bahut bhalī hai

maiñ apne-āp meñ bikhrā huā huuñ muddat se
agar maiñ ḳhud ko sameTūñ to zindagī kam hai

aur abhī tez dauḌnā hai mujhe
zindagī duur kī sadā hai mujhe

mujh ko dikhā rahā thā abhī tak vo sabz baaġh
hai zindagī azaab meñ ab kyā hai kuchh nahīñ

raushan thī jin se sham-e-shabistān-e-zindagī
yādoñ ke is sarāb meñ ab kyā hai kuchh nahīñ

zindagī chauñk chauñk uTThī hai
zikr sun kar sharāb-ḳhāne kā