Tags-Zindagi

samjhe haiñ vo junūñ to junūñ hī sahī mujhe
dānista ab badalnī paḌī zindagī mujhe

yahāñ har qadam pe savāl hai vahāñ har qadam pe malāl hai
baḌī uljhanoñ meñ hai zindagī tire gaañv meñ mire shahr meñ

zindagī talḳh hai bahut 'anjum'
phir bhī zālim se pyaar sā kyuuñ hai

sirf itnī der kī hai zindagī ai dosto
sirf itnī der ko chuTkī bajā kar dekhiye

ai sub.h kī kiran ye ḳhayālāt-e-zindagī
vo baat kaun thī jise ghar ghar kahā gayā

yā muñh na moḌiye kabhī ālām-e-dahr se
yā zindagī ko be-sar-o-sāmāñ banā.iye

maut ke sāhil par istāda huuñ to mujh ko kahīñ
zindagī ke pāniyoñ meñ Dūbtī āvāz de

har shaam zindagī kā nayā ḳhvāb le ke aa.e
har sub.h apnī maut kā manzar dikhā.ī de

ye zindagī hai safar munjamid samundar kā
vahīñ pe shaq ho zamīñ jis jagah ruke koī

zindagī tujh se har ik saañs pe samjhautā karūñ
shauq jiine kā hai mujh ko magar itnā bhī nahīñ

thī hausle kī baat zamāne meñ zindagī
qadmoñ kā fāsla bhī yahāñ ek jast thā

bikhre hue the log ḳhud apne vajūd meñ
insāñ kī zindagī kā ajab bandobast thā

uljhī thī jin meñ ek zamāne se zindagī
kyuuñ ai ġham-e-hayāt vo gesū sañvar ga.e

terī zulfoñ se use kaise judā kartā maiñ
zindagī yuuñ bhī sañvartī hai magar āhista

sab lutf hai ḳhāk-e-zindagī kā
ho ḳhāna ḳharāb āshiqī kā

jab tak jalī jalā kī havā aa.ī bujh ga.ī
ye zindagī bhī sham-e-sar-e-rah-guzār hai

ruuTh kar zindagī kyā jaane kidhar jaane lagī
is tarah dauḌo zarā us ko pukāro logo

koī dekhe tujhe to az-sar-e-nau zindagī māñge
rivāyat jhuuT hai qātil kī sūrat aisī hotī hai

tujh ko paa.eñ tujhe kho baiTheñ phir
zindagī ek thī Dar kitne the

tamāsh-gāh-e-zamāna meñ zindagī apnī
sambhal ke girtī rahī gir ke phir sambhaltī rahī