Tags-Zindagi

kabhī paiġhām-e-sukūñ terī nazar ne na diyā
zindagī chhīn lī is tarah ki marne na diyā

ham ādam-zād jo haiñ roz-e-avval se kamī hai ye
ki jo hai maut us ko jānte haiñ zindagī hai ye

kar murattab kuchh na.e andāz se apnā bayāñ
marne vaale zindagī chāhe to afsāne meñ aa

ḳhatm karnā chāhtā huuñ pech-o-tāb-e-zindagī
yād-e-gesū zor-e-bāzū ban mire shāne meñ aa

'anīs' āsāñ nahīñ ābād karnā ghar mohabbat kā
ye un kā kaam hai jo zindagī barbād karte haiñ

ham añdhere Tāpuoñ meñ zindagī karte rahe
chāñdnī ke des meñ kyā ho rahā thā dekhte

ye bhī ik un kī nigāhoñ kā karishma hai 'mubīn'
zindagī ḳhvāb kī sūrat meñ nazar aatī hai

kyuuñ zahr zindagī ne pilāyā mujhe 'mayañk'
vo bhī to jāntī thī ki shañkar nahīñ huuñ maiñ

phailā fazā meñ naġhma-e-zanjīr-e-marhabā
zindāñ meñ ghuT ke rah na sakī zindagī kī baat

kyā kyā thā hall-e-mas.ala-e-zindagī meñ lutf
jaise kisī kā band-e-qabā kholte rahe

har zindagī kā naam na rakh dil kī zindagī
īmān zindagī pe na lā aazmā ke dekh

kisī kī zindagī zaa.e.a na hogī ab mohabbat meñ
koī dhokā na degā ab koī dhokā na khā.egā

ye zindagī to safar hai 'sābir' safar meñ jab bhī kisī se milnā
tamām sadme bhulāte rahnā muhāl hogā hisāb rakhnā

ḳhudā ābād rakkhe zindagī ko
hamārī ḳhāmushī ko sah ga.ī hai

kitnī māyūsiyāñ haiñ lahrā.ī
zindagī ko na.ī sahar denā

dāstāñ puurī na hone paa.ī
zindagī ḳhatm huī jaatī hai

zindagī aap ke dīvāne kī
kisī sūrat se kaTī jaatī hai

maiñ kabhī kā mar bhī rahtā na ġham-e-firāq sahtā
agar apnī zindagī par mujhe iḳhtiyār hotā

mirī zindagī kā mahvar yahī soz-o-sāz-e-hastī
kabhī jazb-e-vālhāna kabhī zabt-e-ārifāna

zindagī ek hujūm-e-guzarāñ hai lekin
aadmī apnī jagah ālam-e-sad-tanhā.ī