Tags-Zindagi

ajab ye zindagī kī qaid hai duniyā kā har insāñ
rihā.ī māñgtā hai aur rihā hone se Dartā hai

zindagī motiyoñ kī Dhalaktī laḌī zindagī rañg-e-gul kā bayāñ dosto
gaah rotī huī gaah hañstī huī merī āñkheñ haiñ afsāna-ḳhvāñ dosto

hai usī ke jamāl-e-nazar kā asar zindagī zindagī hai safar hai safar
sāya-e-shāḳh-e-gul shāḳh-e-gul ban gayā ban gayā abr abr-e-ravāñ dosto

zindagī bhar to sadā jabr sahe sabr kiye
maut ke ba.ad mujhe kyā jo mirī qabr jiye

zindagī kī dauḌ meñ pīchhe na thā
rah gayā vo sirf do ik gaam se

zindagī jism ke zindāñ meñ ye sāñsoñ kī salīb
ham se toḌī nahīñ jaatī hai magar TūTtī hai

phuul jaisī hai kabhī ye ḳhaar kī mānind hai
zindagī sahrā kabhī gulzār kī mānind hai

chaar din ke vāste sab ko milī hai dahr meñ
zindagī bhī ret kī dīvār kī mānind hai

paas paisa hai nahīñ phir bhī jahāñ meñ mast huuñ
zindagī apnī kisī fankār kī mānind hai

zindagī kis vaqt dhokā de de 'ambar' kyā patā
ye bhī lagtā hai kisī ġhaddār kī mānind hai

maiñ suljhātī huuñ ik mushkil to duujī sāmne aa.e
merī is zindagī se kyuuñ musībat kam nahīñ hotī

ruḳhsat huī shabāb ke hamrāh zindagī
kahne kī baat hai ki jiye jā rahā huuñ maiñ

zindagī jaise calendar pe badaltī tārīḳh
maiñ shab-o-roz ke mānind guzartā jā.ūñ

zindagī rahm ke qābil
ye taslīm

kahīñ fasāna-e-ġham hai kahīñ ḳhushī kī pukār
sunegā aaj yahāñ kaun zindagī kī pukār

zindagī likh dī ḳhudā ne ret par
ham samundar ban ke is ko dho ga.e

ye bhī ik karishma hai bīsvīñ sadī terā
maut ke shikanje meñ zindagī salāmat hai

jaise chāhe jī liije pheñkiye yā pī liije
zindagī to har ghar meñ chaar din kī mohlat hai

zindagī hai ki kisī tarah guzartī bhī nahīñ
aarzū hai ki mirī maut se Dartī bhī nahīñ

zindagī tū bhī koī mauj-e-balā kyuuñ na sahī
ek hī baar mire sar se guzartī bhī nahīñ