Tags-Zindagi

ye zindagī kisī kī amānat hai dosto
gin ke batāo jitne bhī lamhe gañvā.e haiñ

zindagī phir bhī thī dushvār bahut hī dushvār
har qadam saath agar ek masīhā hotā

rāhat guzār dī hai baḌī shaan se hayāt
āñkhoñ meñ zindagī kī khaTakne ke bāvajūd

kuchh aurteñ chalī aa.ī haiñ zindagī-bhar mujhe karte hue muaaf
un kā hamesha rahtā huuñ shukr-guzār

zindagī meñ sab bhale ġhamgīn haiñ
hai alag sab kī kahānī dard kī

muqābla hai ġham-o-alam kā to sāmnā rañj-o-be-kasī kā
rah-e-mohabbat meñ har qadam par nishān miltā hai zindagī kā

yakāyak ik huuk dil meñ uTThī palaT gayā rañg zindagī kā
ba-ḳhair yādash mire laboñ par abhī abhī naam thā kisī kā

jahāñ se dekho fasāna-e-ġham banī huī iztirāb-e-paiham
hoñ terī nazreñ bhī jis se barham kareñge kyā aisī zindagī kā

jo dil pe paiham hai bārish-e-ġham mohabbateñ ho rahī haiñ mohkam
izāfa kartā hai zindagī meñ jo din guzartā hai zindagī kā

aur zindagī ko kitāb
samajh lene vaale

vo nahīñ hai to zindagī kaisī
is añdhere meñ raushnī kaisī

hañs ke jiine kā tum hunar sīkho
zindagī lā-javāb hai pyāre

zindagī harf-e-fanā ke liye tahrīk 'qamar'
ruuh baaqī rahī aur koī ziyāñ tak na huā

maut aa.ī kitnī baar na.ī zindagī huī
niklī magar na phāñs jigar meñ chhupī huī

ye kyā maqām hai insāñ kī zindagī meñ 'nazīr'
nibhā.ī maut se aur zindagī se haar gayā

sharāb o gul-badan saaqī maze aish-o-tarab har-dam
bahār-e-zindagī kahiye to hai mausam javānī kā

zindagī ishq ke maz.hab meñ bitānā chāheñ
ham tire saath kabhī chāñd pe jaanā chāheñ

kahīñ sukūñ na milā dil ko bazm-e-yār ke ba.ad
ki be-qarār rahī zindagī qarār ke ba.ad

niyāz-e-husn bhī hai zindagī ke dhandoñ meñ
kisī pe marne kī fursat mile to mar lenā

na bas meñ zindagī us ke na qaabū maut par us kā
magar insān phir bhī kab ḳhudā hone se Dartā hai