Tags-Zindagi

jis zindagī ko chhoḌ ke aayā huuñ yuuñ shitāb
us zindagī kī mujh ko tamannā bahut rahī

mirā zauq-e-sajda hai zāhirī ki hai kashmakash mirī zindagī
ye gumān dil meñ rahā sadā mirā mudda.ā koī aur hai

maiñ chalā kahāñ se ḳhabar nahīñ ki safar meñ hai mirī zindagī
mirī ibtidā kahīñ aur hai mirī intihā koī aur hai

misl-e-raqs-e-sharar nahīñ aatī
zindagī lauT kar nahīñ aatī

aadmī Thokareñ na khaa.e agar
zindagī raah par nahīñ aatī

vaa.e us zindagī kī mahrūmī
maut bhī umr-bhar nahīñ aatī

tamām ḳhvāb mirī zindagī ke bah nikle
tirī judā.ī meñ ashkoñ kī is ravānī meñ

zindagī tere taġhayyur kī taraf dhyān gayā
jab havāoñ meñ uchhālā gayā sikka koī

maut ḳhāmoshī hai chup rahne se chup lag jā.egī
zindagī āvāz hai bāteñ karo bāteñ karo

mujhe zindagī kī duā dene vaale
hañsī aa rahī hai tirī sādgī par

kis se pūchhūñ bhalā-burā kyā hai
zindagī terā falsafa kyā hai

thoḌī sī is taraf bhī nazar honī chāhiye
ye zindagī to mujh se basar honī chāhiye

āsthā kā rañg aa jaa.e agar māhaul meñ
ek rākhī zindagī kā ruḳh badal saktī hai aaj

zindagī pahle hī jiine kī tarah kab jī hai
ab tire naam pe marne kī sazā pā.eñge ham

hai us kā saath to lab par yahī duā hai ki phir
na aa.e aur koī zindagī ke raste meñ

tumhāre āñgan meñ raushnī ho
hamāre ghar meñ bhī zindagī ho

maiñ zindagī kā naqsha tartīb de rahā huuñ
phir ik jadīd ḳhāka tartīb de rahā huuñ

zindagī ke narm kāñdhoñ par liye phirte haiñ ham
ġham kā jo bār-e-girāñ in.aam le kar aa.e haiñ

vo mujhe ḳhushiyāñ na de aur merī āñkheñ nam na hoñ
hai ye paimāñ zindagī ke aur mere darmiyāñ

har chand zindagī kā safar mushkiloñ meñ hai
insāñ kā aks phir bhī ka.ī ā.inoñ meñ hai