Tags-Zindagi

kahīñ āsār DhūñDeñ zindagī ke
kabhī ye chāñd merā ghar rahā hai

ishq meñ tere koh-e-ġham sar pe liyā jo ho so ho
aish-o-nishāt-e-zindagī chhoḌ diyā jo ho so ho

na vabāl tan pe hai sar mirā nahīñ jaan jaane kā Dar zarā
kaTe ġham hii, nikle jo dam mirā mujhe apnī zindagī baar hai

ġham na dete aap to rāhat se kis ko kaam thā
zindagī kī gardishoñ ke saath daur-e-jām thā

ban gayā har saañs qātil rañj hai to bas yahī
zindagī ne maar Daalā maut par ilzām thā

ishq chaltā hai tā-abad lekin
zindagī saath chhoḌ jaatī hai

savāl ik be-muravvat se talab aisī ki kyā kahiye
ham apnī zindagī se māñgte haiñ aur sukūñ vo bhī

ga.e sab valvale saarī umīdeñ ho ga.iiñ ruḳhsat
bachī hai zindagī baaqī to ab maiñ kyā karūñ vo bhī

musībat zindagī kī kis ke ghar ab sar chhupā.egī
ajal itnī ijāzat de ki maiñ letā chalūñ vo bhī

zindagī biphre hue dariyā kī koī mauj hai
ik daf.a dekhā jo manzar phir kabhī dekhā nahīñ

har ek lamha hameñ Dar hai TuuT jaane kā
ye zindagī hai ki bosīda kāñch kā ghar hai

zindagī se hasīñ udāsī hai
ye mirī ham-nashīñ udāsī hai

zindagī-bhar rahegā saath un kā
ḳhūbsūrat muġhālate meñ huuñ

ḳhabar hī nahīñ kaise añgḌā.ī le kar nigāheñ uThā.e ki sāġhar uThā.e
kuchh aisā nasha chhā gayā zindagī par sambhalte sambhalte qadam Dagmagā.e

koī jā ke mere masīhā se kah de ḳhudā ke liye aag dil kī bujhā de
mohabbat ke sho.ale bhaḌakne lage haiñ kahīñ ḳhirman-e-zindagī jal na jaa.e

na saaqī na botal na hai raqs-e-sāġhar udāsī hai chhā.ī huī anjuman par
fanā-sāzoñ dil se ġhazal aisī chheḌo 'fanā' naach uThe zindagī jhuum jaa.e

āzmā.ish meñ kaTī kuchh imtihānoñ meñ rahī
zindagī kin rāstoñ meñ kin Thikānoñ meñ rahī

likh ga.ī apne gharoñ meñ ek karb-e-nā-tamām
zindagī goyā hamāre mehrbānoñ meñ rahī

maiñ akelā mar rahā thā ghar mirā sunsān thā
raunaq-e-ḳhāna rafīq-e-zindagī daftar meñ thī

zindagī hai ki bastī kisī ġhair kī
tum shanāsā sahī phir bhī ho ajnabī