Tags-Zindagi

vo soz-o-sāz-e-haqīqat se āshnā hogī
vo zindagī jo hama-vaqt imtihāñ meñ hai

maut bhī is liye nahīñ aatī
zindagī zindagī se ḳhālī hai

chūmo lagāo āñkhoñ se sar par rakkho use
ye zindagī varaq kisī injīl kā na ho

ab batāo jā.egī zindagī kahāñ yaaro
phir haiñ barq kī nazreñ sū-e-āshiyāñ yaaro

maut se guzar kar ye kaisī zindagī paa.ī
fikr pā-ba-jaulāñ hai guñg hai zabāñ yaaro

sirf zinda rahne ko zindagī nahīñ kahte
kuchh ġham-e-mohabbat ho kuchh ġham-e-jahāñ yaaro

phūTī kiran to jaag uThī zindagī 'fuzail'
sunsān rāstoñ ke muqaddar badal ga.e

maiñ us ke jhuuT ko bhī sach samajh ke suntā huuñ
ki us ke jhuuT meñ bhī zindagī kī quvvat hai

zindagī tak sitam to sah le 'soz'
phir to ye zulm baar baar kahāñ

sard ThiThurī huī lipTī huī sarsar kī tarah
zindagī mujh se milī pichhle december kī tarah

surūd-e-ġham par bhī zindagī meñ tarab ke dhāre bahā rahā huuñ
maiñ un ke sāz-e-jafā par apnī vafā ke naġhme sunā rahā huuñ

zindagī zauq-e-numū zauq-e-talab zauq-e-safar
anjuman-sāz bhī hai garm-e-tag-o-tāz bhī hai

hai aadat duur rahne kī agar vo sāmne aa.e
maiñ shām-e-zindagī chāhūñ visāl-e-yār se pahle

phailtā jaatā hai har samt añdherā 'sāgar'
zindagī jaise ho ik bujhtā diyā tere ba.ad

kyā labālab roz o shab the aur kyā vahshī thā maiñ
zindagī se duur ho kar aadmī bantā gayā

zindagī ne kaise rāzoñ kī piTārī khol dī
āgahī kā har tayaqqun gumrahī bantā gayā

zindagī-bhar 'asr' go rindoñ ke ham-mashrab rahe
phir bhī dīvānoñ meñ farzāne se gardāne ga.e

gardish meñ zindagī rahī afvāh kī tarah
umreñ guzār dī ga.iiñ ḳhauf-o-hirās meñ

shāmil ho gar na ġham kī ḳhalish zindagī ke saath
rakkhe na koī rabt-e-mohabbat kisī ke saath

jiine na deñ hayāt kī paiham sharārteñ
insāñ jo ḳhud sharīr na ho zindagī ke saath