Tags-Zindagi

hayā-e-rūh gul-e.azāz bhī hai
shu.ūr-e-zindagī kā raaz bhī hai

ba.ad muddat ke ḳhayāl-e-mai-o-mīnā aayā
zindagī phir mujhe jiine kā qarīna aayā

rone vaale yuuñ musībat par na ro
zindagī ik dard-e-sar ho jā.egī

aa rahā hai inqilāb-e-hashr-ḳhez
zindagī zer-o-zabar ho jā.egī

bardāsht dard-e-ishq kī dushvār ho ga.ī
ab zindagī bhī jaan kā āzār ho ga.ī

talāsh karnā paḌe hañsne kā sabab tujh ko
ai zindagī na tū itnī bhī hoshiyārī rakh

maiñ zindagī ke safar meñ thā mashġhala us kā
vo DhūñD DhūñD ke mujh ko gañvā diyā kartā

ishq se phir silsila jumbānī-e-ġham kījiye
zindagī par maut ko pahle muqaddam kījiye

maut kā kyā maut kā to sau tarah ġham kījiye
zindagī nāshād kā kis tarah mātam kījiye

maiñ rizq-e-ḳhvāb ho ke bhī usī ḳhayāl meñ rahā
vo kaun hai jo zindagī ke imtihān meñ nahīñ

an-ginat jaam piye zillat-o-rusvā.ī ke
zindagī aur tire naaz uThā.eñ kaise

ye to vaqt vaqt kī baat hai koī ro diyā koī hañs diyā
mirī vārdāt-e-dil-o-nazar mirī zindagī pe guzar ga.ī

zahr pī kar bhī jiyūñ maiñ ye alag baat magar
zindagī us lab-e-rañgīñ kī halāvat māñge

ik bagūla uThā dasht meñ kho gayā ik kiran thī jo zulmat meñ gum ho ga.ī
zindagī jis ko samjhe the ham zindagī zindagī misl-e-raqs-e-sharar bhī na thī

ye aur baat ise zindagī na kah paa.eñ
vagarna aaj bhī ham jī rahe haiñ jiine ko

lījiye phir toḌ dī yāroñ ne zanjīr-e-sukūt
lījiye ham zindagī kā marsiya kahne lage

maiñ kaise tujh ko pukārūñ kahāñ se lā.ūñ tujhe
tire baġhair agar zindagī azaab lage

mere ham-nafas mere ham-navā mujhe dost ban ke daġhā na de
maiñ huuñ dard-e-ishq se jāñ-ba-lab mujhe zindagī kī duā na de

ishq kī talḳh-kāmiyoñ ke nisār
zindagī kāmyāb kaun kare

be-rabt ho ga.ī hai tire baad is tarah
phir zindagī ko ham se guzārā nahīñ gayā