Tags-Zindagi

zindagī tujh ko bahut kuchh to samajh hī ga.e ham
kuchh hijābāt haiñ baaqī so uThā chāhte haiñ

yahī umr bhar kā dukh hai yahī zindagī kā sukh hai
na koī fareb-e-hastī na shu.ūr-e-dil-rubā.ī

lab-e-ḳhāmosh meñ pinhāñ hai koī raaz nahīñ
zindagī saaz hai jis meñ koī āvāz nahīñ

zindagī merī huī hai phir niDhāl
ye umīd-e-be-sabātī kā kamāl

qabza uThā.egī na dil-e-rozgār se
jab tak na zindagī kā kare iḳhtitām hirs

kāñdhoñ pe tere ābrū-mandī kā bojh hai
ye rāh-e-zindagī hai qadam Thiik se uThā

koī bhī nuqta-e-ḳhat zindagī pe ban na sakā
raqam kahīñ se ye tamsīl-e-dilrubā kar dī

vo shaḳhs zindagī kī bulandī na chhū sakā
vo jis kā saañs phuul gayā ho chaḌhāv par

masarrat meñ bhī hai pinhāñ alam yuuñ bhī hai aur yuuñ bhī
surūd-e-zindagī meñ zer-o-bam yuuñ bhī hai aur yuuñ bhī

jām-e-ishq pī chuke zindagī bhī jī chuke
ab 'hilāl' ghar chalo ab to shaam ho ga.ī

ye zindagī hai yahāñ is tarah hī hotā hai
sabhī ne bojh se laade haiñ kuchh utāre bhī

tārīk zindagī ko banāne lagā hai vo
sūraj se raushnī ko churāne lagā hai vo

zindagī tujh ko magar sharm nahīñ aatī kyā
kaisī kaisī tirī tasvīr nikal aa.ī hai

vaqt kartā hai ḳhud-kushī mujh meñ
lamha lamha hai zindagī mujh meñ

kaT rahī hai saañs ḳhud ko girvī rakhvāte chhuḌāte
zindagī ke naam par sab log ḳhud ko chhal rahe haiñ

zindagī ke āḳhirī lamhe ḳhushī se bhar gayā
ek din itnā hañsā vo hañste hañste mar gayā

kirshn 'mohan' ye bhī hai kaisā akelā-pan ki log
maut se Darte haiñ maiñ to zindagī se Dar gayā

agar hai zindagī manzūr be-soche fanā ho jā
mazāq-e-āshiqī meñ nīstī kā naam hastī hai

bahut hī saḳht garche zindagī ke ma.arke the bhī
khulā hai mujh pe har bāb-e-zafar āhista āhista

faqat ik sa.ī-e-paiham zindagī kā apnī unvāñ hai
shab-e-tārīk se phūTī sahar āhista āhista