Tags-Zindagi

is zindagī ne saath kisī kā nahīñ diyā
kis bevafā se tujh ko tamannā vafā kī hai

har rañg zindagī hai tah-e-gard-o-rozgār
tasvīr kī vo raunaq-o-ra.anā.ī kam huī

shām-e-visāl-e-dard ne jaate hue kahā
kal phir mileñge dost agar zindagī rahī

bahut zindagī kā bhalā chāhtā huuñ
ba-alfāz-e-dīgar qazā chāhtā huuñ

maiñ karvaToñ ke na.e zā.iqe likhūñ shab-bhar
ye ishq hai to kahāñ zindagī azaab karūñ

ye zindagī jo mujhe qarz-dār kartī rahī
kahīñ akele meñ mil jaa.e to hisāb karūñ

jise guzār ga.e ham baḌe hunar ke saath
vo zindagī thī hamārī hunar na thā koī

kise pukārte ham rāh-e-zindagī meñ 'arsh'
har ek shaḳhs ḳhud apne hī intizār meñ thā

zindagī chamke mirī mehr-e-daraḳhshāñ kī tarah
tum agar saath do merā shab-e-hijrāñ kī tarah

zindagī bhar kareñge us kī talāsh
chal baseñge isī takābū meñ

ab bhī ik umr pe jiine kā na andāz aayā
zindagī chhoḌ de pīchhā mirā maiñ baaz aayā

hamāre vāste hai ek jiinā aur mar jaanā
ki ham ne zindagī ko jāda-e-rāh-e-safar jaanā

zindagī duniyā meñ aisā ashk thī
jo zarā palkoñ pe Thahrā bah gayā

us se pūchh ai kāmyāb-e-zindagī
jis kā afsāna adhūrā rah gayā

zindagī kahte ik tamāshā hai
apnā kirdār bas adā kiije

sukūñ hāsil hai din meñ aur na shab ko chain miltā hai
ki ab to kashmakash meñ zindagī hai aur bas maiñ huuñ

ye ishq rāhbar-e-manzil-e-qayāmat hai
vo aa.e saath jise zindagī gañvānī ho

ye zindagī hai apnī kabhī ḳhush kabhī udaas
is kashmakash se mujh ko ḳhudāyā rihā.ī de

inhī ravāñ davāñ lahroñ pe zindagī kaT jaa.e
ho terā saath mayassar to paar utarnā kyā

zindagī ho magar dard-e-hijrāñ na ho
aise jiine kī kyā aarzū kījiye