Tags-Zindagi

yahī zindagī musībat yahī zindagī musarrat
yahī zindagī haqīqat yahī zindagī fasāna

kitnī mahfūz zindagī thī kabhī
dushmanī thī na dostī thī kabhī

talāsh-e-qāfila-e-zindagī hai ab be-sūd
ye rah-guzār-e-nafas par kahīñ na Thahregā

baiza-āsā nañg-e-bāl-o-par hai ye kunj-e-qafas
az-sar-e-nau zindagī ho gar rihā ho jā.iye

'aḳhtar' guzarte lamhoñ kī aahaT pe yuuñ na chauñk
is mātamī julūs meñ ik zindagī bhī hai

mai-kashī kā ham pe gar ilzām hai to ho 'asīr'
koī aise zindagī bhar zahr pī kar dekhtā

zindagī itnī majbūr sī ho ga.ī
hādse mujh ko ashkoñ se bharte rahe

zindagī ke ā.īne kī aab hai 'hāmid' ḳhudī
apnī sāñsoñ se judā ehsās-e-ḳhud-dārī na rakh

nazar kyā aap kī badlī mizāj-e-zindagī badlā
jo pahle jāñ-fazā thī mai vahī kam hotī jaatī hai

kisī kā ġham samo.e jaatā hai rag rag meñ rañg aise
ki apnī zindagī husn-e-mujassam hotī jaatī hai

ġham kam haiñ zindagī meñ zarā aur pāliye
jo mas.ale nahīñ haiñ unheñ bhī uchhāliye

yuuñ simaTnā bhī hai koī zindagī ai dosto
zindagī hai vus.at-e-ālam pe chhāne ke liye

zindagī dho ke roz piitā huuñ
aur piine ko kuchh bachā hai kyā

kaise ḳhurshīd us ko badloge
zindagī koī qāfiya hai kyā

kyā nasheb-o-farāz thī 'tanvīr'
zindagī aap ne guzār hī dī

bichhaḌ kar aap se jiine kī ḳhvāhish kufr hai lekin
hamārī zindagī hī be-hayā hai kyā kiyā jaa.e

charāġh se kabhī tāroñ se raushnī māñge
añdherī raat bhī kis kis se zindagī māñge

lo terī chaukhaT pe zindagī kā maiñ faisla ab ke le rahī huuñ
tū mere dast-e-savāl par ab koī na koī javāb likhnā

zindagī bhar lahū rulā.egī
yād-e-yārān-e-be-ḳhabar shāyad

maut ke aaseb se 'raunaq' abas Darte haiñ log
zindagī bhar zindagī se pyaar honā chāhiye