Tags-Zulf

dil apnā ulajhtā thā tabhī jin dinoñ pyāre
thī zulf tirī turra-e-lailā ke dinoñ meñ

sub.h hotī hī nahīñ aur nahīñ kaTtī raat
ruḳh pe khole vo kahīñ zulf-e-siyāh-fām na ho

hue jo ye mubtalā-e-ulfat asiir dām-e-visāl ke haiñ
havā-e-zulf-e-ḳhayāl-e-jānāñ banī huī tauq-e-gardnī hai

ai zulf-e-yār tujh se bhī āshufta-tar huuñ maiñ
mujh sā na koī hogā pareshān-e-rozgār

aaj ye hai mausam kā taqāzā
zulf tirī khul kar lahrā.e

apne sar ik balā to lenī thī
maiñ ne vo zulf apne sar lī hai

huā hai ham ko ik mutrib pisar kī zulf kā saudā
hamārā shor-e-vahshat bhī ye ik paTTā hai shorī kā

kaun fariyād sune zulf meñ dil kī tū ne
hai musalmān ko kāfir ke amal meñ maarā

khīñche dil-e-insāñ ko na vo zulf-e-siyah-fām
azhdar koī gar us ko nigal jaa.e to achchhā

bikhrī huī ho zulf bhī is chashm-e-mast par
halkā sā abr bhī sar-e-mai-ḳhāna chāhiye

jab kisī āshiq ne kuchh hāl-e-pareshānī kahā
hañs diye muñh pher kar zulf-e-pareshāñ kī taraf

zulf o ruḳhsār ke tasavvur meñ
husn o nāz-o-adā kī baat kareñ

sab ke jaisī na banā zulf ki ham sāda-nigāh
tere dhoke meñ kisī aur ke shāne lag jaa.eñ

ai hashr numā.inda-e-raftār Thahar jā
us zulf ke sadqe jo tirī paañv paḌī hai

phir se bikhrī hai tirī zulf mire shānoñ par
vaqt aayā hai ga.e vaqt ko lauTāne kā

huī sahar ḳhatm par hai mahfil uTho ki 'afsar' uchāT hai dil
na husn meñ ab vo dilkashī hai na zulf meñ ab vo hal rahe haiñ

na jhaTko zulf se paanī ye motī TuuT jā.eñge
tumhārā kuchh na bigḌegā magar dil TuuT jā.eñge

kyā din the vo bhī 'lutf' ki rahte the misl-e-zulf
kānoñ se us ke ham se pareshāñ lage hue

tañg-o-mahdūd bahut husn-e-nazar thā pahle
zulf-o-ruḳhsār pe mauqūf hunar thā pahle

nāḳhun ke chāñd zulf ke bādal laboñ ke phuul
kis ehtimām se tujhe tashkīl dī ga.ī