Tags-Zulf

ham na shāna na sabā haiñ nahīñ khultā hai ye bhed
aiñTHtī jaatī hai kyuuñ zulf-e-pareshāñ ham se

suntī hai roz naġhma-e-zanjīr-e-āshiqāñ
vo zulf bhī hai silsila-e-ahl-e-chisht meñ

gale se dil ke rahī yuuñ hai zulf-e-yār lipaT
ki juuñ sapere kī gardan meñ jaa.e maar lipaT

sukhāne zulf vo aa.e haiñ chhat par
hai sūraj aaj phir sahrā huā sā

jo suḳhan-ras āshnā haiñ zulf-o-kākul ke tirī
un ko mazmūñ bhī nahīñ miltā hai sumbul ke sivā

isī se garmī-e-dār-o-rasan hai inqilāboñ meñ
bahāroñ meñ yahī zulf-o-qad-e-jānāna bantā hai

'hātim' us zulf kī taraf mat dekh
jaan kar kyuuñ balā meñ phañstā hai

butāñ jab ki zulf-e-dotā bāñdhte haiñ
girah meñ dil-e-mubtalā bāñdhte haiñ

kisī zulf ko sadā do kisī aañkh ko pukāro
baḌī dhuup paḌ rahī hai koī sā.ebāñ nahīñ hai

choTī kī guñdhāvaT kahīñ dikhlātī hai lahreñ
rakhtī hai kahīñ zulf-e-pareshān tamāshā

jo havā se zulf bikhar ga.ī nazar un kī saaf badal ga.ī
jo asīr-e-halqa-e-nāz the vo qatīl-e-teġh-e-adā hue

sehat achchhī na ho to zulf-e-nisvānī se bachnā
fishār-e-ḳhūñ ke hamle meñ namak-dānī se bachnā

mire shāne par yahī zulf thī jo hai aaj mujh se khiñchī khiñchī
mire haath meñ yahī haath thā tumheñ yaad ho ki na yaad ho

ghaTāoñ meñ tūfāñ ke āsār haiñ
tirī zulf hai aaj barham bahut

koī aur qissa shurūa kar jo tamām kah sake ham-nafas
ki fasāna zulf-e-siyāh kā shab-e-hijr se bhī darāz hai

nāra-e-zulf-e-sanam shart-e-junūñ kyā ma.anī
dard rusvā hī sahī ishq jahāñgīr sahī

savād-e-manzar-e-ḳhvāb-e-pareshāñ kaun dekhegā
asīr-e-zulf ho kar shām-e-hijrāñ kaun dekhegā