Tags-Zulf

dast-o-pā maare bahut chāh-e-zanaḳh meñ dil ne
haath lekin na gayā zulf kī zanjīr talak

zulf dekhī vo dhuāñ-dhār vo chehrā dekhā
sach batā dekhne vaale use kaisā dekhā

vo zulf havā se mujhe barham nazar aa.ī
uḌtī huī nāgan qadd-e-āmdam nazar aa.ī

tum bāloñ ko khole hue gulshan meñ jo aa.e
har shāḳh-e-shajar zulf-e-namat-ḳham nazar aa.ī

hamārī āshuftagī salāmat sulajh hī jā.egī zulf-e-daurāñ
jo pech-o-ḳham rah gayā hai baaqī vo pech-o-ḳham bhī nikāl deñge

yak shab dekhī jin ne vo zulf
lākhoñ dekhe roz-e-siyāh

ab chhoḌiye tasavvur-e-zulf-o-mizha 'sahar'
dasht-e-ġham-e-jahāñ meñ koī sā.ebāñ kahāñ

phir sabā meñ hai na.ī dīvāngī
kyā mizāj-e-zulf phir barham huā

khaa.ī hogī vahī qasam tū ne
phir kisī zulf kī shikan chhū kar

zulf ke ḳham hoñ yā jahān ke ġham
mar miTe ham jidhar se guzre haiñ

raat bhar maiñ ne sañvārī zulf-e-lailā-e-ġhazal
sher kī aamad thī 'hāshim' yā koī sailāb thā

havā bahisht ke bāġhoñ kī zulf zulf phire
tirī lahad tire bālīñ ke gard jū-e-sharāb

sailī meñ juuñ ki laTakkā ho 'ābrū' yuuñ dil
sajan kī zulf meñ laTkā liyā faqīroñ kā

kamāñ huā hai qad abrū ke gosha-gīroñ kā
tabāhe haal tirī zulf ke asīroñ kā

sabaq ko dekhtā huuñ raat bhar aur phir ulajhtā huuñ
mutavval muḳhtasar vo sharh-e-sher-e-zulf-e-pechāñ hai

zulf-e-shab-rañg ko ham yaad kiyā karte haiñ
shab-e-tārīk meñ fariyād kiyā karte haiñ

ham hī 'āġhāz' garm-e-sahrā the
zulf kyā sāya-e-shajar hotī

zulf-o-ruḳh kyā kaheñ din kahīñ raat hai
ik jahāñ jaag uThā ik jahāñ so gayā

muntashir jis ne kiyā thā un kī zulf-e-nāz ko
sach agar pūchho to vo bād-e-sabā thī maiñ na thā

azal se dushmanī tā.ūs o maar aapas meñ rakhte haiñ
dil-e-pur-dāġh ko kyūñkar hai ishq us zulf-e-pechāñ kā