Tags-Zulf

jis tarah kaale ke man ke rū-ba-rū gul ho charāġh
dekh kar ta.avīz-e-zulf-e-yār bujh jaatī hai sham.a

uljhan ġham-e-hayāt kī kuchh aur baḌh ga.ī
aa.ī hai jab bhī zulf shikan-dar-shikan kī yaad

zulf o kākul se qavī husn kā baazū hai mudām
qafas o daam rahe jaise ki sayyād ke saath

shab kī tārīkī baḌhtī hī jaa.e
kaun aatā hai zulf bikhrā.e

merī girah-e-dil na khulī hai na khulegī
jab tak na khule zulf-e-girah-gīr kisī kī

chhalke hue the jaam pareshāñ thī zulf-e-yār
kuchh aise hādsāt se ghabrā ke pī gayā

ishq pahlū meñ hai phir jalva-e-jānāna liye
zulf ik haath meñ ik haath meñ paimāna liye

zulf-e-kāfir-kesh lipTegī qadam se ai sanam
hindu-e-shab bhī karegā but-parastī ek din

shikan-e-zulf halqa-e-gesū
beḌiyāñ bhī haiñ hathkaḌī hī nahīñ

tā-hadd-e-nazar khultī ga.ī zulf-e-do-ālam
ehsās ye kis kā dil-e-bedār meñ khīñchā

kyā kahūñ chhiTke hue bāloñ ne kyā Dhāyā ġhazab
dil pareshāñ ho gayā zulf-e-pareshāñ dekh kar

ai jaañ hai terī zulf-e-pareshāñ kā husn aur
hūroñ ke baal haiñ jo sañvāre hue to kyā

kahūñ kyā kyā maiñ naqshe us kī nāgin zulf ke yaaro
lipaTnā uḌ ke aanā kaaT khānā phir palaT jaanā

jo roz hai ruḳh to zulf hai shab zaqan hai mānind chāh-e-naḳhshab
ye haal hai bachpane meñ yārab to hogā ahd-e-shabāb kaisā

zulf ulajhte hai un ke bāloñ se
saañp kā sar kuchalte jaate haiñ

ham ko na zulf-e-yār na dīvār se ġharaz
ham ko to yād-e-yār kī parchhā.iyāñ bahut

sab tirī zulf ke hisār meñ haiñ
par ye elaan kaun kartā hai

jin par na saa.e zulf-e-ġhazālāñ ke paḌ sake
ehsās kī nigāh meñ vīrāne ban ga.e

taaza ho dimāġh apnā tamannā hai to ye hai
us zulf kī bū sūñghiye saudā hai to ye hai

har zabāñ par hai misl-e-shāna mudām
zikr tujh zulf kī darāzī kā