Tags-Zulf

us zulf meñ ka.ī din se betābī-e-dil gum hai
zanjīr jhanaktī na.iiñ kyā mar chukā dīvāna

ab nahīñ jannat mashām-e-kūcha-e-yār kī shamīm
nik.hat-e-zulf kyā huī bād-e-sabā ko kyā huā

haiñ zulf o ruḳh ai shoḳh tire qātil-e-ālam
kāfir hī ko dekheñ na ye dīñ-dār ko dekheñ

vo zulf-e-pareshāñ kā sañvāre na sañvarnā
vo un ke bigaḌne kī adā yaad rahegī

laam nastālīq kā hai us but-e-ḳhush-ḳhat kī zulf
ham to kāfir hoñ agar bande na hoñ is laam ke

dekhī thī ek raat tirī zulf ḳhvāb meñ
phir jab talak jiyā maiñ pareshān hī rahā

khultā nahīñ ye uqda ki ho baiThe shaad kyuuñ
kis ko asīr-e-zulf-e-girah-gīr kar chuke

bāhar hai zabt-e-sharm se āshuftagī mirī
tum bhī asīr-e-zulf-e-girah-gīr kar chuke

tumhārī zulf se kam hai shab-e-hijr
magar roz-e-qayāmat se baḌī hai

nahīñ haTtī tumhāre chehre se zulf
ye shāyad bosa lene par aḌī hai

ai dost terī zulf-e-pareshāñ kī ḳhair ho
merī tabāhiyoñ kā na itnā ḳhayāl kar

zulf-e-gītī sañvārne vaale
sādgī meñ baḌā siñghār sā hai

daḳhl har dil meñ tirā misl-e-suvaidā ho gayā
al-amāñ ai zulf-e-ālam-gīr saudā ho gayā

zindagī hai ki bulātī hai taqāzoñ kī taraf
dil giraftār-e-ḳham-e-zulf-e-chalīpā.ī hai

ai sabā tujh ko usī zulf-e-pareshāñ kī qasam
merā shīrāza-e-hastī bhī pareshāñ karnā

ai dil us zulf kī rakhiyo na tamannā baaqī
hashr tak varna rahegī shab-e-yaldā baaqī

ga.ī thī kah ke maiñ laatī huuñ zulf-e-yār kī bū
phirī to bād-e-sabā kā dimāġh bhī na milā

ab qurbat-o-sohbat-e-yār kahāñ lab o aariz o zulf o kanār kahāñ
ab apnā bhī 'mīr' sā aalam hai Tuk dekh liyā jī shaad kiyā

bikhre hue se 'rāhī' ye aurāq-e-zindagī
apnī hayāt zulf-e-pareshāñ se kam nahīñ

nasīm-e-gul is zulf meñ ho to aa
na kar apnī ḳhushbū pe itnā ghamanD