Tags-Zulf

jo dil-āvez hai us zulf-e-girah-gīr kī bū
aisī aalam meñ kisī kī nahīñ tāsīr kī bū

kis kī ḳhātir hai pareshāñ tirī zulf
ham isī fikr meñ shab bhar jaage

ruḳh-e-raushan pe fidā aur na siyah-zulf kā ḳhabt
na koī din hai mujhe aur na koī raat mujhe

nazar jin kī ulajh jaatī hai un kī zulf-e-pechāñ se
vahī baḌh kar lipaT jaate haiñ aksar mauj-e-tūfāñ se

zulf ke janjāl meñ phañsne kī ḳhud kartā duā
maiñ siḌī thā jo ḳhudā se apnī shāmat māñgtā

bikher ruḳh pe zarā apne is tarah zulfeñ
ki zulf chehre pe tere naqāb ho jaa.e

sar kiyā zulf kī shab ko to sahar tak pahuñche
varna ham log kahāñ husn-e-nazar tak pahuñche

khulī ho zulf to sar par dupaTTā rakh lenā
na aisā ho kahīñ purvā.iyāñ ulajh jaa.eñ

chhuḌāyā thā nipaT mushkil se phir aah
dil aTkā us kī zulf-e-pur-shikan meñ

sab munajjam kahte haiñ ab hai barābar raat din
sar se pā tak dekh kar zulf-e-darāz-e-yār ko

dil-e-sad-chāk bāb-e-zulf hai lek
baav sī bañdh rahī hai shāne kī

zulf kā kyā us kī chaTkā lag gayā
zor-e-dil ke haath laTkā lag gayā

dekhnā zulf-o-ruḳh tumheñ har vaqt
shaam dekho na tum sahar dekho

jaanā na thā pareshāñ kar degī tū vagarna
ham pech meñ bhī aate ai zulf-e-yār pahle

nik.hat-e-zulf se nīndoñ ko basā de aa kar
merī jaagī huī rātoñ ko sulā de aa kar

maiñ āftāb-zada huuñ kahāñ hai zulf us kī
ki aa.e aur mirī āñkhoñ pe apnī shaam lagā.e

kyā kahūñ dil mā.il-e-zulf-e-dotā kyūñkar huā
ye bhalā chañgā giraftār-e-balā kyūñkar huā

kyā kareñge vo mirī rātoñ ko raushan 'arshad'
ruḳh pe jo zulf-e-siyah-fām liye phirte haiñ

paḌā huuñ ġhash meñ mujhe suñghā do pasīna chehre kā zulf kī bū
nahīñ hai kam laḳhlaḳhe se mujh ko ye mushk-e-gesū gulāb-e-āriz

dekhiye tā-kamar zulf kā sho.abada
uljhaneñ ban ga.iiñ dāstāñ dekhiye