Tags-Zulf

shām-e-ġhurbat ham se majrūhoñ kī hai fariyād-ras
zulf kī chhātī phaTī hai sunte hī shāne kī arz

ek hai tū bhī bad-balā ai chashm
dil ko phir zulf meñ phañsā maarā

zulf Daale hai gardan-e-dil meñ
daam kyā kyā baḌhā ahā-hāhā

hiltī hai zulf jumbish-e-gardan ke saath saath
nāgin bhī hai lagī huī rahzan ke saath saath

adā-e-nāz bhī hai husn-o-ihtizāz kī baat
ki tār-e-zulf nahīñ añg añg mahke hai

uljhā hai ye dil pyāre zulf apnī ko suljhāve
jab mar ga.e jaanī ham phir shāna huā to kyā

kab ḳhayāl-e-zulf meñ har raat ko
dil pe mere saañp lahrātā nahīñ

ka.ī chāñd the sar-e-āsmāñ ki chamak chamak ke palaT ga.e
na lahū mire hī jigar meñ thā na tumhārī zulf siyāh thī

bayān-e-zulf-e-chalīpā meñ qit.a likh likh kar
dikhā.e ḳhatt-e-shikasta kā pech-o-tāb qalam

zulf kab kī ātish-e-ayyām se kumhlā ga.ī
zulf kā saaya nahīñ Dhaltā sar-e-mū aaj bhī

phir rahā huuñ maiñ uThā.e hue yuuñ bār-e-hayāt
mere shāne pe tirī zulf paḌī ho jaise

aah ko chāhiye ik umr asar hote tak
kaun jiitā hai tirī zulf ke sar hote tak

ye zulf-bar-dosh kaun aayā ye kis kī aahaT se gul khile haiñ
mahak rahī hai fazā-e-hastī tamām aalam bahār sā hai

ab kahīñ bhī nazar aate nahīñ aariz ke gulāb
ab koī zulf kahāñ sumbul-o-raihāñ kī tarah

sab se pahle to siyāhī mirī qismat ko milī
jo bachī thī vo tirī zulf-e-dotā ne le lī

musta.id zulf mirī rañj pe hai
hai muhayyā sar-o-sāmān-e-balā

garmī-e-ruḳh se araq-rez hai zulf
hai guhar-bār ye naisān-e-balā

dil chaḌhā mushkil se tāq-e-abru-e-ḳhamdār par
sau jagah raste meñ jab zulf-e-rasā pakḌī ga.ī

dil kī chorī meñ jo chashm-e-surma-sā pakḌī ga.ī
vo thā chīn-e-zulf meñ ye be-ḳhatā pakḌī ga.ī

ruḳh se gul ko thā ta.alluq zulf se sumbul ko mel
ek jā gāñThā use ye ek jā pakḌī ga.ī