Tags-Zulf

tire ruḳhsār se be-tarah lipTī jaa.e hai zālim
jo kuchh kahiye to bal khā uljhatī hai zulf be-Dhañgī

muñh par naqāb-e-zard har ik zulf par gulāl
holī kī shaam hī to sahar hai basant kī

kuchh ġhazab ho rahī haiñ aariz se
zulf-e-pur-pech-o-tāb kī bāteñ

zulf-o-ruḳhsār kī ziyā le kar
ham ne apnī ġhazal sañvārī hai

mānind-e-zulf ġhair ko kyuuñ sar chaḌhā.iye
āñkhoñ se shakl-e-ashk ke is ko utāriye

tilism-e-zulf kī lahreñ Dubo hī detī haiñ
kanār-e-shām jab mauj-e-sharāb buntā huuñ

sar paañv se jab phañs ga.e us zulf-e-siyah meñ
jab ham ko syāhī-e-shab-e-dījūr kī sūjhī

jab zulf kī kālak meñ ghul jaa.e koī raahī
badnām sahī lekin gumnām nahīñ hotā

roz o shab guzre hai pech-o-tāb meñ rahte tujhe
ai dil-e-sad-chāk kis kī zulf kā tū shāna thā

tujh se mil ke bhī terā intizār rahtā hai
sub.h rū-e-ḳhandāñ se shaam zulf-e-barham tak

jo dekhe kaalā to khā mare sam ye us ke mukhḌe pe 'aish' jis dam
havā se hotī hai zulf kī laT kabhī idhar ko kabhī udhar ko

mahak rahā hai har ik gul kā jāma-e-rañgīñ
sabā ne baaġh meñ kyā zikr-e-zulf-e-yār kiyā

evaz apne garebāñ ke kisī kī zulf haat aatī
hamāre haat ke panje magar shāne hue hote

kuchh ab ke ham bhī kaheñ us kī dāstān-e-visāl
magar vo zulf-e-pareshāñ khule to baat chale

garebāñ ham ne dikhlāyā unhoñ ne zulf dikhlā.ī
hamārā samjhe vo matlab ham un kā mudda.ā samjhe

tū jā kar chheḌ gul ko yā kisī kī zulf-e-pechāñ ko
chal ai bād-e-sabā tū kyā mirī nāz-o-adā samjhe

siyah-baḳhtī pe saaya gar ho terī zulf-e-shab-gūñ kā
use vo apne sar pe sāya-e-bāl-e-humā samjhe

mere tūl-e-shab-e-judā.ī ko
terī zulf-e-darāz kyā jaane

jo apne farā.ez se nipaTne meñ ulajh jaa.e
ham log use zulf-e-pareshāñ nahīñ kahte

shurū-e-ishq meñ sab zulf o ḳhat se Darte haiñ
aḳhīr umr meñ in hī meñ dhyān lagtā hai