Tags-Baam

ai kaḌī chup ke dar o baam sajāne vaale
muntazir koī sar-e-koh-e-nidā hai kab se

na koī dast-e-sabā thā na kahīñ bū-e-habīb
bām-dar-bām thī be-mehr nigāhoñ kī salīb

ham ḳhāk-nashīñ tum suḳhan-ārā-e-sar-e-bām
paas aa ke milo duur se kyā baat karo ho

qumquma hai ki lab-e-bām liye baiThī hai
tīrgī apnī hathelī pe ujāle kī Dalī

aise lipTe haiñ dar-o-bām se ab ke jaise
hādsoñ ne baḌī muddat meñ mirā ghar dekhā

tire firāq kā ġham vo hai ki dilāse ko
tā-sub.h baam pe māh-e-munīr rahtā hai

shab-e-visāl kī ye shaam bhī hai rashk-e-sahar
mahak mahak ke saraktī hai bām-o-dar kī dhuup

parinde lauT ke jab ghar ko jaane lagte haiñ
hameñ bhī yaad dar-o-bām aane lagte haiñ

tere dil-soḳhta baiThe haiñ sar-e-bām abhī
baal khole hue tāroñ bharī is chhat pe na jā

kahāñ se TuuT paḌī beach meñ fasīl-e-jahāñ
mo.āmla to faqat mere bām-o-dar kā thā

mire dilrubā mire dilrubā na ye lutf hai na koī atā
agar aanā hai to phir aa bhī jā na yuuñ jhāñk rauzan-e-bām se

ahbāb mujh se qat-e-ta.alluq kareñ 'jigar'
ab āftāb-e-zīst lab-e-bām aa gayā

ka.ī DaaT kaam nasīb the jise baam baam ma.āsh ke
vo mināra ret kā devtā thā vo jal-pasand ke sāmne

sahar ke bhūle sar-e-shām lauT ā.eñge
laveñ baḌhā ke charāġhoñ kī baam par rakkho

zamīn-o-arsh-o-falak pā.emāl hote haiñ
na jaao sahn se bālā-e-bām uTh uTh kar

qayāmat aa.ī hai halchal hai āsmānoñ par
na phiriye bahr-e-ḳhudā baam baam uTh uTh kar

hamāre bām-e-dar se aaj bhī lipTī hai tārīkī
hamāre āsmānoñ meñ batāo kab ugā sūraj

larzāñ haiñ bām-o-dar pe ga.ī mahfiloñ ke saa.e
āñkhoñ meñ uḌ rahī hai dayār-e-butāñ kī dhuul

yādoñ ke dar-o-bām pe ik naam vahī naam
kyā jaane ka.ī baar likhā us se na kahnā

bād-o-bārāñ bhī nahīñ baam nahīñ dar bhī nahīñ
koī chhīno na mire gosha-e-tanhā.ī ko