Tags-Baam

sub.h kā dhokā huā hai shaam par
chāñd ko dekhā achānak baam par

tū sar-e-bām havā ban ke guzartā kyuuñ hai
mere malbūs kī aadat nahīñ lahrā jaanā

manā rahe haiñ manānā thā jin ko jashn-e-bahār
mire nasīb meñ taz.īn-e-bām-o-dar aa.ī

imshab tulū-e-yār kā manzar ajiib thā
bām-e-buland matla-e-anvār ban gayā

khultī hai chāñdnī jahāñ vo koī baam aur hai
dil ko jahāñ sukūñ mile vo to maqām aur hai

miTTī meñ māhtāb kī ḳhushbū kā bhed thā
kis justujū meñ ham lab-e-bām-e-azal ga.e

vo makāñ jis ke dar-o-bām ka.ī sāloñ se
muntazir haiñ, koī mahtāb-sifat shahzāda

jo ūñche ūñche haiñ vahī jaate haiñ baam par
mahfil meñ ham ġharīboñ ko miltā hai yaar kab

jab kūche meñ jā baiThte haiñ tere to apnī
āñkheñ lagī rahtī haiñ dar-o-bām se tere

allāh-re un ke husn kī mojiz-numā.iyāñ
jis baam par vo aa.eñ vahī koh-e-tūr ho

dekh kar bām-o-dar kā sannāTā
bol uThtā hai ghar kā sannāTā

vo 'āftāb' lab-e-bām bhī utar aa.e
magar kisī meñ use dekhne kī taab to ho

kyuuñ na ho shauq jalva-e-lab-e-bām
ab javānī uThān par kuchh hai

maiñ uḌ rahā thā fazāoñ kī vus.atoñ meñ magar
mirā vajūd abhī bām-o-dar kī qaid meñ thā

umr baḌhtī ga.ī juuñ juuñ māñ-bāp kii, āmad-o-raft mahdūd hotī ga.ī
baiThe baiThe dar-o-bām takte rahe bolnā-chālnā muḳhtasar kar liyā

ab tak bhī hai nazar taraf-e-bām-e-māh-vash
maiñ garche āftāb-e-lab-e-bām ho gayā

sabhī ko dhun hai ki shīshe ke bām-o-dar hoñ magar
ye dekhte nahīñ patthar abhī baraste haiñ

nazar aa jā.egā duniyā ko barq-o-tūr kā aalam
dam-e-dīdār be-ḳhud mujh ko zer-e-bām hone do

zamīñ ko mil ke sañvāreñ misāl-e-rū-e-nigār
ruḳh-e-nigār se raushan charāġh-e-bām kareñ

be-dar-o-bām Thikānā jis meñ dhuul dhuup sannāTā ġham
vahī hai mujh vahshī ke ghar meñ jo kuchh hai vīrānoñ meñ