Tags-Baam

sar-e-bām-e-hijr diyā bujhā to ḳhabar huī
sar-e-shām koī judā huā to ḳhabar huī

kachche āñgan kā vo ghar vo bām-o-dar
gaañv kī pagDañDiyāñ vo rahguzar

phailā hai jaal baam pe zulf-e-darāz kā
totā uḌe na haath se ahl-e-niyāz kā

vo buland-bām taare vo falak-maqām taare
vo nishān de ke apnā rahe be-nishāñ hamesha

ye ziine jaldī jaldī chaḌhne vaale
pas-e-az-bām kyā hai kuchh ḳhabar hai

hazāroñ dīda-o-dil-e-bām lākhoñ tuur se baḌh kar
karoḌoñ jalva-gāheñ shauq to ho ḳhud-numā.ī kā

ab ḳhaak ho aiman ke bayābāñ meñ tajallī
'afqar' koī be-parda sar-e-bām nahīñ hai

sunahrī yādeñ hī paltī rahīñ jis āñgan meñ
maiñ us mahal ke dar-o-bām honā chāhtā huuñ

kasāfat-e-zindagī kī zulmat meñ sham-e-haq zau-fishāñ ho kaise
jahāñ kī bujhtī huī nigāhoñ ko jagmagātā hai bām-e-nānak

ishq pe kaisā dukh paḌā husn pe kyā guzar ga.ī
aaj galī udaas hai aaj vo baam par nahīñ

ishq meñ bām-o-dar bhī na pīchhe rahe
saath apne makīñ ke makāñ bhī gayā

bām-o-dar chīḳhte haiñ reñgtī tanhā.ī meñ
shahr meñ ḳhaak uḌātī hai havā mere ba.ad

vo rashk-e-mai kare bālā-e-bām mai-ḳhvārī
ilāhī aaj ḳhat-e-kahkahshāñ ho jū-e-sharāb

dekhe kahīñ mujh ko to lab-e-bām se haT jaa.e
is vaz.a se us kī mirā dil kyūñki na phaT jaa.e

pā-e-dīvār se phir merī tarah vo na uThā
jin ne dekhā tujhe yakbār sar-e-bām kahīñ

sunte haiñ chamaktā hai vo chāñd ab bhī sar-e-bām
hasrat hai ki bas ek nazar dekh leñ ham bhī

maiñ bām-o-dar se pūchh aa.uuñ koī aayā to nahīñ
'salīm' raat Dhal ga.ī mirā makān aa gayā

vo merā sher jab merī hī lai meñ gungunātī thī
manāzir jhūmte the bām-o-dar ko vajd aatā thā

ek lau hai ki sar-e-bām thiraktī hai bahut
ik diyā hai ki darīchoñ meñ bahut boltā hai

paan khā khā ke lab-e-bām pe vo aane lagā
ḳhuuñ hamārā pas-e-dīvār huā chāhtā hai