Tags-Baam

na bām-o-dasht na dariyā na kohsār mile
junūñ kī raah thī hālāt sāzgār mile

na jaane kis kā hameñ intizār rahtā hai
ki bām-o-dar ko hamesha sajāte rahte haiñ

raat ik ujḌe makāñ par jā ke jab āvāz dī
guuñj uTThe bām-o-dar merī sadā ke sāmne

taare āñkheñ jhapak rahe the
thā baam pe kaun jalva-gar raat

kabhī to bām-e-surayyā ko chuum hī legā
bahut latīf hai aadam kī jumbish-e-abrū

rañg meñ Duubā huā hai qarya-e-chashm-e-ḳhayāl
bām-o-dar se phūTtī hai ḳhushnumā chehroñ kī guuñj

vo mire sahn meñ utre haiñ ujāle kahiye
shaam taktī hai dar-o-bām ko hairāñ ho kar

āñkhoñ meñ damak uTThī hai tasvīr-e-dar-o-bām
ye kaun gayā mere barābar se nikal kar

'kaifī' kab tak ye ḳhvāb-e-ġhaflat
mehr lab-e-bām ho chukā hai

kahāñ kahāñ na ga.e ālam-e-ḳhayāl meñ ham
nazar kisī ke dar-o-bām par lagā.e hue

mātamī shaam utar aa.ī hai phir baam talak
ghar kī tanhā.ī ko bahlā.e koī kaise bhalā

yuuñ to is ghar ke dar-o-bām sabhī TuuT ga.e
haañ magar biich kī dīvār abhī rah ga.ī hai

raat koThe pe chaḌhā vo to kahūñ kyā yaaro
manzar-e-bām se us ke vo ujālā niklā

maslūb āftāb sar-e-shām kyuuñ huā
honā thā hādisa to lab-e-bām kyuuñ huā

ai kaash hamārī qismat meñ aisī bhī koī shaam aa jaa.e
ik chāñd falak par niklā ho ik chāñd sar-e-bām aa jaa.e

bālā-e-bām aane kā gar hausla nahīñ
palkoñ kī chilmanoñ meñ simaT kar kalām kar

achānak gar vo be-āmad hī kamre meñ barāmad ho
tavajjoh ham ne to markūz bām-o-dar pe rakkhī hai

mirī nazar ko dar-o-bām par lagāyā huā hai
chalo kisī ne mujhe kaam par lagāyā huā hai

mirī nadīm mohabbat kī rif.atoñ se na gir
buland bām-e-haram hī nahīñ kuchh aur bhī hai