Tags-Baam

maiñ huuñ ḳhurshīd-e-sar-e-koh yaqīñ hai ki vo maah
aa.egā baam pe tab jab ki maiñ Dhal jā.ūñgā

phir lab-e-bām chamaktī huī āñkheñ dekhīñ
phir gunāhoñ ke havas-kār ishāre chamke

so ga.e ghar ke sab makīñ par mire intizār meñ
jaag rahe haiñ bām-o-dar raat bahut guzar ga.ī

raunaq-e-bām-o-dar nahīñ baaqī
kaise kah duuñ ki ghar nahīñ baaqī

us ātishīñ-rū ko ba-lab-e-bām jo dekhā
aalam ne kahā gumbad-e-gardāñ meñ lagī aag

tāmīr-e-nau qazā-o-qadar kī nazar meñ hai
aaj ek zalzala sā har ik bām-o-dar meñ hai

bām-o-dar par hai musallat aaj bhī shām-e-alam
yuuñ to in galiyoñ se ḳhurshīd-e-sahar bhī ho gayā

mirī lag rahīñ chhat se āñkheñ haiñ dekho
musharraf kab is se lab-e-bām hogā

Dhah chukī thiiñ jab tamannā.eñ sabhī khañDarāt meñ
shahr-e-dil meñ phir ye bām-o-dar kahāñ se aa ga.e

din kī bedard thakan chehre pe le kar mat jā
bām-o-dar jaag rahe hoñge abhī ghar mat jā

ai 'shagufta' vo parī-rū mujh se farmātā hai ye
tum ko dikhlā.eñge apnā aaj zer-e-bām raqs

dosto ek do jaam kī baat hai dosto ek do gaam kī baat hai
haañ usī ke dar-o-bām kī baat hai baḌh na jaa.eñ kahīñ dūriyāñ dosto

huuñ tā.ir-e-be-bām charāġh-e-sar-e-sahrā
ummīd-e-karam hai na mujhe shikva-e-bedād

ye kaun aayā hai bām-e-ārzū par
fazāoñ meñ ujālā ho rahā hai

kisī ke ūñche dar-o-bām mohtaram the magar
hameñ havā ke liye rāsta banānā thā

vo bhī aate haiñ baam par aise
jis tarah māhtāb aatā hai

jab se apne ghar ke bām-o-dar se nikle haiñ
kaise kaise manzar pas-manzar se nikle haiñ

le uḌegī havā-e-bām hameñ
na kareñge jo nardbāñ TuuTe

itnī burī nahīñ hai khañDar kī zamīn bhī
is Dher ko sameT na.e bām-o-dar uThā

chauñkā huuñ nīm-shab bhī yahī soch soch kar
vo āftāb ab bhī lab-e-bām hī na ho