Tags-Bahaar

zard gul aur laal patte haiñ
'arsh' aisī bahār ko bhī dekh

ye hai shaam mausam-e-dard kī ye hai sub.h chehra-e-zard kī
hai bahār par ġham-e-zindagī koī dil-ḳhizāñ ho to le ke aa

haa.e ye husn-e-tasavvur kā fareb-e-rañg-o-bū
maiñ ye samjhā jaise vo jān-e-bahār aa hī gayā

nau-bahār aa.ī mubārak hue juuñ ġhuncha-o-gul
ḳhātir-jam.a tujhe hāl-e-pareshāñ mujh ko

jaam de saaqī nau 'uzlat' ko ki jaatī hai bahār
rove hai fasl-e-gul-o-abr-e-bahārāñ mujh ko

saaqī ho mai ho gaa.eñ parī-zād sab bahār
sāġhar se jald chalne meñ charḳh-e-dutā na ho

ham haiñ fasl-e-bahār aur tū gulistāñ
tū agar āsmāñ hai to ham kahkashāñ

ai sub.h-e-vatan ai sub.h-e-vatan
ai rūh-e-bahār ai jān-e-chaman

bahār aa kar jo gulshan meñ vo gaa.eñ
to ġhuncha har taraf chuTkī bajā.eñ

hai kināre ye jamunā ke ik shāhkār
dekhnā chāñdnī meñ tum is kī bahār

nazar na aa.e kahīñ ye bahār kā aalam
agar tasavvur-e-rū-e-chaman-tarāz na ho

dhuum machā.e bahār kabhī aur paat hare kabhī piile hoñ
har nairañgī-e-qudrat dekhe yaksāñ hī dil-gīr hameñ

mai-ḳhāna-e-bahār meñ muddat kā tishna-lab
saaqī ḳhatā-muāf! ḳhatā khā ke pī gayā

nā-mumkināt meñ se to shāyad na ho 'na.īm'
aamad bahār kī nahīñ āsān kam se kam

barsā hai kis babūl pe abr-e-bahār-ḳhez
itnā harā to zaḳhm-e-tamannā kabhī na thā

na.ī bahār kā muzhda bajā sahī lekin
abhī to aglī bahāroñ kā zaḳhm taaza hai

tujh meñ kab husn-e-bahār-e-gul kī ra.anā.ī na thī
kab tire jalvoñ kī ik duniyā tamāshā.ī na thī

huā shikār siyāsat kā ab ke mausam bhī
bahār aa.ī hai lekin ḳhizāñ ko saath liye

us peḌ ko ghamanD bahut thā bahār meñ
lekin ḳhizāñ meñ vo bhī nigūñ mujh ko mil gayā

ḳhizāñ ke be-kaif daur kā bhī mire garebāñ ye kuchh to haq hai
junūñ ko āḳhir banā.e rakkhūñ niyāz-mand-e-bahār kab tak