Tags-Bahaar

vo bād-e-sar-sar kī be-qarārī vo bijliyāñ aur vo sho.ala-bārī
bas ab qafas hī meñ mutma.in huuñ nazar ko shauq-e-bahār kab tak

tamām umr tire intizār meñ hamdam
ḳhizāñ-rasīda rahā huuñ bahār kar mujh ko

lahakte sabze meñ abr-e-bahār kī mastī
dahakte phuul meñ chhalkī huī sharāb kī aañch

mausam-e-lāla-o-gul ahd-e-bahār-e-gulshan
ye kahīñ aap kā andāz-e-tabassum to nahīñ

gul kuuñ ai shoḳh mukh tanik dikhlā
ki ḳhizāñ kar dikhā de us kuuñ bahār

mire badan ko namī khā ga.ī hai ashkoñ kī
bharī bahār meñ kaisā makān Dhahtā hai

bach nikalne pe mire ḳhush nahīñ vo jān-e-bahār
koī ilzām mukarrar mire sar aatā hai

na ḳhūn-e-dil hai na mai kā ḳhumār āñkhoñ meñ
basī huī hai tumhārī bahār āñkhoñ meñ

kunj-e-qafas hī jis kā muqaddar huā 'jamīl'
us kī nazar meñ daur-e-ḳhizāñ kyā bahār kyā

kyuuñ 'bayāñ' sair-e-bāġh kī ruḳhsat
nahīñ detā bahār meñ koī

ġharaz vo din ki jab mire chaman meñ ik bahār thī
ġharaz vo din ki jab ḳhushī mire liye siñgār thī

ḳhayāl hai ḳhizāñ meñ bhī mujhe usī bahār kā
ġhazab hai chhoḌtā nahīñ fareb intizār kā

agar dekhoge aks us ḳhat kā merī chashm-e-giryāñ meñ
lab-e-jū par bahār-e-sabza-e-gulshan na dekhoge

guzar gayā yūñhī chup-chāp kārvān-e-bahār
naved-e-gul bhī na dī dil-figār bhī na kiyā

ba-qadr-e-josh-e-junūñ taar taar bhī na kiyā
vo pairahan jise nazr-e-bahār bhī na kiyā

tumhārā jism ma.abad-e-tasavvur-e-nashāt hai
mufakkir-e-bahār kī ye bandagī qubūl ho

har daaġh ubhar ke zaḳhm banā zaḳhm rashk-e-gul
dil mā.il-e-bahār hamārā nahīñ rahā

hai hai ḳhabar bahār kī sunte hī mar gayā
ik āh-e-sard murġh-e-giraftār khīñch kar

koī fazā koī mausam ho ham se ho mansūb
bahār agar nahīñ miltī hameñ ḳhizāñ to mile

chaman par ek din fasl-e-ḳhizāñ kā raaj bhī hogā
abas hai dil meñ armān-e-bahār-e-jāvedāñ rakhnā