Tags-Bandagi

yaad hai bandagi-e-ahl-e-mohabbat jis par
aap bhī faḳhr o mabāhāt kiyā karte the

abas ye mashq-e-rukū-o-sujūd hai yaaro
agar pata nahīñ mafhūm-e-bandagī kyā hai

sīkhī yahīñ mire dil-e-kāfir ne bandagī
rabb-e-karīm hai tū tirī rahguzar meñ hai

ḳhulūs-e-dil na ho shāmil to bandagī kyā hai
zamāna khel samajhtā hai sar jhukāne ko

vo laakh jhukvā le sar ko mere magar ye dil ab nahīñ jhukegā
ki kibriyā.ī se bhī ziyāda mizāj nāzuk hai bandagī kā

ba-rañg-e-sāya hameñ bandagī meñ hai taslīm
ki dāġh-e-dil ba-jabīn-e-kushāda rakhte haiñ

jahān-e-nau kā tasavvur hayāt-e-nau kā ḳhayāl
baḌe fareb diye tum ne bandagī ke liye

lahū se dil ke charāġhāñ karo ḳhudā-ḳhāna
taḌap jo ruuh meñ hogī to bandagī hogī

'asad' ye ijz-o-be-sāmānī-e-fir.aun-e-tauam hai
jise tū bandagī kahtā hai da.avā hai ḳhudā.ī kā

duniyā ko ham dikhā.eñge me.ār-e-bandagī
qismat banā ke uTTheñge ab tere dar se ham

rakh diye dair o haram sar mārne ke vāste
bandagī ko be-niyāz-e-kufr-o-īmāñ kar diyā

hai ḳhudā sāmne mere maujūd
aa ga.ī bandagī bulandī par

nañg-āqā.ī hai merī bandagī
aap kyuuñ huuñ merī zillat meñ sharīk

ḳhud kahīñ dil kahīñ dimāġh kahīñ
maiñ tirī bandagī se Dartī huuñ

kuchh nahīñ iḳhtiyār meñ apne
bandagī ke sivā duā ke sivā

namāz-e-ishq jo shāmil nahīñ ibādat meñ
fareb-e-kufr sarāsar hai bandagī kyā hai

hazār baar chāhtā huuñ bandishoñ ko toḌ duuñ
magar ye āhanī rasan ye halqa-hā-e-bandagī

tavāf-e-dair-o-ka.aba se yahī hāsil huā mujh ko
mohabbat hī sarāpā bandagī ma.alūm hotī hai

ye bandagī kā sadā ab samāñ rahe na rahe
sar-e-niyāz jhuke āstāñ rahe na rahe

ye jo mere man meñ hai raushnī yahī zindagī yahī bandagī
mirī fikr meñ tire zikr meñ jo charāġh haiñ vo jalā piyā