Tags-Bandagi

vahī 'nisār-turābī' jabīñ kā hāsil hai
vo ek sajda jise bandagī ne dekhā hai

hai ajiib qismat-e-'kaif' bhī ye milā hai hāsil-e-bandagī
ki mazāq-e-sajda bhī kho diyā kisī sañg-e-dar kī talāsh meñ

farishte sajda-e-tāzīm par hue majbūr
mirā niyāz mirī bandagī kahāñ tak hai

hastī bajā.e ḳhud hai ik kār-gāh-e-hastī
ham mast-bandagī meñ vo banda-parvarī meñ

ehsās kā parinda jaagā hai mere andar
us kī atā se ḳhush huuñ dil mahv-e-bandagī hai

jabīn-e-shauq hai aur un kā āstāna hai
jo bandagī ye nahīñ hai to bandagī kyā hai

junūn-e-bandagī kī laaj rakhnā
agar ādāb-e-sajda bhuul jā.ūñ

kitne zamāne lamhoñ kī ġhaflat se mar ga.e
saa.at kī bandagī ko zamāne diye ga.e

jabīn-e-bandagī jis dam banā.ī ḳhāliq-e-kul ne
usī ke saath Daalī hai binā-e-āstāñ shāyad

pahuñchtī hai maqām-e-intihā par bandagī jis dam
hamāre paañv kī Thokar se bhī chashme ubalte haiñ

ka.aba bhī but-kada bhī hai rāh-e-bandagī meñ
ye manzileñ haiñ kaisī dushvār āshiqī meñ

darāz ho rahe imkāñ bhī ab ibādat ke
hisār-e-bandagī goyā hisār-e-vahshat hai

mire nāsehā mire nukta-chīñ tujhe mere dil kī ḳhabar nahīñ
maiñ harīf-e-maslak-e-bandagī tujhe sañg-e-dar kī talāsh hai

shāyad apnā ḳhudā tarāsh liyā
ab kahāñ hai vo bandagī apnī

bandagī ye kyā jaane dair kyā haram kyā hai
ham jahāñ pe haiñ vaa.iz kufr hai na īmāñ hai

hameñ ye sharm ki ham se to bandagī na huī
vo chāhtā hai ki misl-e-ḳhudā nazar aa.e

sidq-o-safā-e-qalb se mahrūm hai hayāt
karte haiñ bandagī bhī jahannam ke Dar se ham

bandagī kī lau ho aisī jis meñ ki
sañg-e-marmar tak pighalnā chāhiye

bandagī ek apnī kyā kam hai
aur kuchh tum se kahiye kyā sāhab

farishte imtihān-e-bandagī meñ ham se kam nikle
magar ik jurm kī pādāsh meñ jannat se ham nikle