Tags-Bandagi

sajde mire ḳhayāl-e-jazā se haiñ māvarā
maqsūd bandagī se tijārat nahīñ mujhe

ye bandagī ḳhudā.ī vo bandagī gadā.ī
yā banda-e-ḳhudā ban yā banda-e-zamāna

be-bandagī bhī us kī rahī banda-parvarī
miltā rahā agarche maiñ saa.il nahīñ rahā

adab zāhid kā hai itnā bahut ai ahl-e-mai-ḳhāna
jab āñkheñ chaar ho jaa.eñ to jhuk kar bandagī kar lo

nirālī ham ne ye tahzīb dekhī bazm-e-jānāñ meñ
adū bhī sāmne aa.e to us ko bandagī kar lo

mahall-e-sajda jahāñ hogā sar jhukegā vahīñ
asīr-e-qaid-e-ta.ayyun na bandagī hogī

aah us kī be-kasī tū na jis ke saath ho
haa.e us kī bandagī jis kā tū ḳhudā nahīñ

umr bhar saaqī na chhoḌī mai-kada kī bandagī
ek hī paimāne par karte haiñ ye paimān ham

agar lālach se jannat ke jahannum kī ye dahshat se
kiye jo umr bhar sajde bhī to ye bandagī kyoñ ho

yaqīnan vaj.h-e-baḳhshish nāz-e-umr-e-bandagī hotā
kiyā hotā agar shāyān-e-dar ik sajda bhī maiñ ne

gañvā duuñ kaise maiñ is tarah yūñhī
tujhe paayā hai maiñ ne bandagī se

ye nafrateñ ye kudūrateñ kyoñ haiñ aage sīrat se sūrateñ kyoñ
yahāñ haiñ maujūd ab bhī insāñ phir ādamiyat kī bandagī kyoñ

'ġhālib' nadīm-e-dost se aatī hai bū-e-dost
mashġhūl-e-haq huuñ bandagi-e-bū-turāb meñ

yūñhī kisī kī koī bandagī nahīñ kartā
butoñ ke chehroñ pe tevar ḳhudā ke rakkhe the

kab bandagī merī sī banda karegā koī
jaane hai ḳhudā us ko maiñ tujh ko ḳhudā jaanā

ishq ko ab le chaleñ aao ik aise moḌ par
pyaar meñ jo kuchh bhī ho vo bandagī hone lage

hudūd-e-dair-o-haram se haT kar jhukā jabīn-e-niyāz apnī
ġharaz se jab be-niyāz hogā to ujrat-e-bandagī milegī

mirī zindagī tirī bandagī se judā nahīñ kabhī ġhaur kar
mare ijtihād pe tū ne ġhaur kiyā na ho kahīñ yuuñ na ho

maiñ kahāñ se lā.ūñ vo zindagī jo sarāsar us kī ho bandagī
mirī ruuh kī jo talab hai us kī razā na ho kahīñ yuuñ na ho

kare jo bandagī so ho gunahgār
nyārī hai yahāñ kī kuchh ḳhudā.ī