Tags-Bandagi

na pūchhiye ki vo kis karb se guzarte haiñ
jo āgahī ke sabab aish-e-bandagī se ga.e

vahī rañj hai to yuuñ hī sahī vo 'qalaq' hī thā ki yuuñ hī nibhī
mirī aap ko bhī hai bandagī mirā ishq ko bhī salām hai

bandagī-āmoz bazm-e-zindagī bechārgī
aadmī ko jab ġharaz aTkī salām aa hī gayā

ḳhudā maane hue ho ek but ko
karoge ab usī kī bandagī kyā

use dair-o-haram meñ jāzbiyyat kyā nazar aa.e
jo terī diid ko asl-e-mazāq-e-bandagī samjhe

nazar ko jur.at-e-takmīl-e-bandagī na huī
tavāf-e-kūcha-e-dil-dār kar ke chhoḌ diyā

matā-e-be-bahā hai dard-o-soz-e-ārzūmandī
maqām-e-bandagī de kar na luuñ shān-e-ḳhudāvandī

aadmī raushnī nahīñ paa.e
jab talak bandagī nahīñ paa.e

tirā ishq hai mirī zindagī tirā zikr hai mirī bandagī
tujhe yaad kartā huuñ maiñ sadā mujhe kaam hai isī kaam se

falak-shigāf thā is darja iztirāb-e-amal
ki bandagī meñ farishtoñ ko bhī sukūñ na milā

us kuuñ sharaf hai jis kī kareñ bandagī qubūl
jo 'ābrū' talab haiñ so apnā ġhulām jaan

is ḳhud-fareb dil ne vo rusvā kiyā hameñ
ham apne ho sake na tirī bandagī huī

tere dīvāne bhī puuje jā.eñge ik din yuuñ hī
ho rahī hai jaise terī bandagī tere baġhair

bandagī ham ne tabī.at meñ vo paa.ī hai ki bas
sar ḳhudāoñ ke ka.ī dosh meñ gir jaate haiñ

kitnā fareb-kār hai ehsās-e-bandagī
ham manzil-e-ḳhudī se bahut duur aa ga.e

'hasrat' phir aur jā ke kareñ kis kī bandagī
achchhā jo sar uThā.eñ bhī is āstāñ se ham

jannat kī tū mazdūrī būjhā hai bandagī ko
baḳhshish nahīñ hai hargiz juz lutf aur ināyat

hai farz buujh avval apnā pichhe ḳhudā ko
be-būjh bandagī hai sab rañj aur malāmat

dostī bandagī vafā-o-ḳhulūs
ham ye sham.eñ jalānā bhuul ga.e

mirā qalam nahīñ tasbīh us maballiġh kī
jo bandagī kā bhī har dam hisāb rakhtā hai