Tags-Barg

baiThiye peḌoñ kī utran kā alaav tāpiye
barg-e-sozāñ ke sivā darvesh kuchh rakhtā nahīñ

ye daraḳht-e-kuhan lisān-ul-ġhaib
aur ye shāḳh-e-ḳhushk barg-e-nabāt

na barg-o-gul kī tamannā na rañg-o-bū kī havas
'sahāb' mujh ko ḳhizāñ sāz-gār aa.ī hai

ham to barbād hue barg-e-ḳhizāñ kī sūrat
shāḳh-e-gul kaun tujhe zauq-e-numū detā hai

ye jañg to laḌnā hī hogī har barg se chāhe ḳhuuñ Tapke
kāñToñ se jo gul Dar jā.egā dārā-e-gulsitāñ kyā hogā

jis haath meñ hai shamshīr-o-tīr kyā us se umīd-e-barg-o-samar
jo shāḳh-e-nasheman toḌegā memār-e-gulistāñ kyā hogā

ḳhudā bachā.e bagūloñ kī zad meñ aa.e haiñ
vo barg-e-sabz jo mauj-e-havā se Darte rahe

aate haiñ barg-o-bār daraḳhtoñ ke jism par
tum bhī uThāo haath ki mausam duā kā hai

bajā.e rañg rag-e-ġhuncha se lahū Tapke
khile jo phuul to har barg-e-gul sharar ho jaa.e

kuchh is adā se chale bād-e-barg-rez ḳhizāñ
ki duur tak saf-e-ashjār be-samar ho jaa.e

badan-darīda-o-be-barg-o-bār honā bhī
mire hī vāste phir sharmsār honā bhī

jabhī laa.ī hai sabā mausam-e-gul kī aahaT
barg afsurda hue shāḳhoñ ko Darte dekhā

chhiḌke hai shabnam ā.īna-e-barg-e-gul par aab
ai andalīb vaqt-e-vadā-e-bahār hai

dil kī na pūchho kyā kuchh chāhe dil kā to phailā hai dāman
giit se gaal ġhazal sī āñkheñ sā.ad-e-sīmīñ barg-e-dahan

raas aa.e to hai chhāñv bahut barg o shajar kī
haath aa.e to har shāḳh samar-rez bahut hai

hamārā ahd hai be-barg-o-bār shāḳhoñ se
agarche qāfila-e-rañg-o-bū pukārtā hai

aisā be-barg o be-navāhī kaun
jaise be-barg o be-navā haiñ ham

barg malte haiñ jo kaf-e-afsos
kis ke ġham meñ haiñ sogvār daraḳht

mausam-e-gul hai josh-e-mastī hai
laa.e gulshan meñ barg-o-bār daraḳht

shāḳhoñ se barg-e-gul nahīñ jhaḌte haiñ baaġh meñ
zevar utar rahā hai urūs-e-bahār kā