Tags-Barham

maiñ hī nahīñ huuñ barham us zulf-e-kaj-adā se
Tuk muñh tirā jo paa.eñ uljheñ abhī havā se

inkār-e-mohabbat ko tauhīn samajhte haiñ
iz.hār-e-mohabbat par ho jaate haiñ barham bhī

bhulāyā hai mujhe tū ne tirī barham-mizājī ne
magar bedard terī yaad phir bhī kam nahīñ hotī

pahle hī se barham-kun-e-mahfil thī tabī.at
māhaul magar ham se ḳhafā aur bhī niklā

tumhārī barham se uThne kā bhī ḳhayāl mujhe
zarā sī der Thaharne kā hīla-jū bhī maiñ

zindagī se zindagī rūThī rahī
aadmī se aadmī barham rahā

us kā shikva nahīñ kar sakte ki vo dil ke ta.iiñ
ḳhush nahīñ kartā to barham bhī nahīñ kartā hai

barham mizāj-e-fitarat-e-insāñ hai aaj kal
kis maḳhmase meñ ġhairat-e-yazdāñ hai aaj kal

aañkh se kaT kaT jaate the saare manzar
raat se rañg-e-dīda-e-hairāñ barham thā

ik ḳhvāb-e-ātishīñ kā vo mahram sā rah gayā
dīvār-o-dar meñ sho.ala-e-barham sā rah gayā

'hafīz' un se maiñ jitnā bad-gumāñ huuñ
vo mujh se us qadar barham na hoñge

ġhairoñ se dostī ko baḌhāyā hai apnā haath
ḳhud kitnā apne aap se barham rahā huuñ maiñ

ye mumkin hai tumhārā aks hī barham ho chehre se
ise tum aa.ine kī sargirānī kyuuñ samajhte ho

zulf-e-barham kī jab se shanāsā huī
zindagī kā chalan mujrimāna huā

un kī rahmat se duur nahīñ lekin is par majbūr nahīñ
iġhmāz kareñ har laġhzish par sajdoñ par barham ho jaa.eñ

ham us ke aañkh se ojhal hone kā matlab kyā lete haiñ
vo aañkh se ojhal ho to nazāre darham-barham ho jaa.eñ

jab tak ham haiñ mumkin hī nahīñ nā-mahram mahram ho jaa.eñ
aatā hai unheñ ġhussa aa.e hote haiñ vo barham ho jaa.eñ

kyā kam thā pahle darham-o-barham ai āsmāñ
jo aur mujh ko darham-o-barham kiyā gayā

na.ī tahzīb ke me.amār shāyad us se ġhāfil haiñ
ba-īñ āsār-e-ālam darham-o-barham bhī hotā hai

chaman meñ kis ke ye barham hui hai bazm-e-tamāshā
ki barg barg-e-saman shīsha reza-e-halabī hai