Tags-Barish

bārish kuchh itnī tez huī ab ke tanz kī
gir gir ke bār-bār sambhalnā paḌā mujhe

gard hamāre gharoñ tak phail ga.ī
us mausam meñ koī bārish nahīñ

kisī kī nazroñ kī narm bārish se jab bhī bhīge badan kī miTTī
sulagtī sāñsoñ ke pairahan par hadīs-e-husn-o-shabāb likhnā

miTTī ke saath zehn ko bhī kuchh numū milī
bārish huī to thoḌe se ash.ār ho ga.e

laboñ par tabassum to āñkhoñ meñ aañsū thī dhuup ek pal meñ to ik pal meñ bārish
hameñ yaad hai bātoñ bātoñ meñ un kā hañsānā rulānā rulānā hañsānā

tere āñgan meñ luTā hai kyā hai
vo bhī bārish meñ khulā hai kyā hai

ek lamhe ko tirī samt se uTThā bādal
aur bārish kī sī ummīd lagā lī maiñ ne

ye kis kī yaad kī bārish meñ bhīgtā hai badan
ye kaisā phuul sar-e-shāḳh-e-jāñ khilā huā hai

ajiib baat hai us pe sitam ki bārish hai
jo chāhtā hai tumheñ tum pe jaan detā hai

ye būñdeñ pahlī bārish kii, ye soñdhī ḳhushbū maaTī kī
ik koyal baaġh meñ kuukī hai, āvāz yahāñ tak aa.ī hai

aarī hai magar zaḳhm se har sāya-e-dīvār
har chand kī dīvār pe bārish kā nishāñ hai

allāh-re majbūrī allāh-re mahrūmī
yā bārish-e-sahbā thī yā jaam nahīñ aatā

afsūñ pahlī bārish kā
ik dhultā lafz nigārish kā

ab ke bārish ko bhī to aane de
kuchh sitam mausamoñ ko Dhāne de

dil meñ jab ash.ār kī hotī hai bārish be-shumār
nutq par būñdeñ Tapak paḌtī haiñ kuchh be-iḳhtiyār

yaad aa.ī vo pahlī bārish
jab tujhe ek nazar dekhā thā

bārish huī to hai magar itnī ki ye zarūf
ḳhālī nahīñ rahe haiñ to bhar bhī nahīñ ga.e

kisī ḳhayāl meñ mad.hosh jā rahā thā maiñ
añdherī raat thī tārīkiyoñ kī bārish thī

ik umr ho ga.ī ki hai bārish meñ chashm-e-tar
ab tak na koī naḳhl-e-tamannā harā huā