Tags-Barish

chhatoñ pe bārish duur pahāḌī halkī dhuup
bhīgne vaalā pañkh sukhāne vaalā maiñ

mehrbāñ qatroñ kī bārish abr-e-ā.inda meñ hai
fasl-e-imkāñ ab ke mausam be-samar hai bhī to kyā

lahū kī bārish meñ zard phūloñ kī pattiyoñ se likhā gayā huuñ
maiñ lafz kā zā.iqa zabāñ par asar mirī ḳhaak meñ milegā

lipaT ga.ī hai mire zehn se tirī ḳhushbū
maiñ jal rahā huuñ ki bārish ke mausamoñ meñ aa

gaurayyoñ ne jashn manāyā mere āñgan bārish kā
baiThe baiThe aa ga.ī niiñd isrār thā ye kisī ḳhvāhish kā

zamāne meñ mohabbat kī agar bārish nahīñ hotī
kisī insān ko insān kī ḳhvāhish nahīñ hotī

nafrat ke sañg-rezoñ kī bārish thame kabhī
dair-o-haram ke beach safar ḳhush-gavār ho

bārish meñ bhī vo bhīgtā rahtā hai ḳhushī se
āñdhī meñ bhī vo peḌ duhā.ī nahīñ detā

ek vīrān darīche pe ḳhizāñ kī bārish
koī tasvīr banātī rahī āvāz ke saath

miTā diye the sabhī harf ġham kī bārish ne
ajiib haal mirī ziist kī kitāb kā thā

rañg tasvīroñ kā utrā to kahīñ Thahrā nahīñ
ab ke vo bārish huī har naqsh phīkā rah gayā

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

log gir jaate haiñ miTTī ke gharoñdoñ kī tarah
is tarah bārish-e-dīdār na barsāyā kar

bārish barasne dhuup ke khilne meñ huuñ sharīk
shāḳhoñ pe koñpaloñ ke nikalne meñ aa rahūñ

māñgte haiñ kyuuñ 'muzaffar' log bārish kī duā
tishnagī-e-rūh kā jismoñ ko andāza nahīñ

pā.eleñ bāñdh ke bārish kī karūñ raqs-e-junūñ
tū ghaTā ban ke baras aur maiñ sahrā ho jā.ūñ

chale aate haiñ be-mausam kī bārish kī tarah aañsū
basā-auqāt rone kā sabab kuchh bhī nahīñ hotā

batā rahī hai ye ḳhushk pattoñ kī tez bārish
ham apne mausam kī ibtidā tak pahuñch ga.e haiñ

kachche makān jitne the bārish meñ bah ga.e
varna jo merā dukh thā vo dukh umr bhar kā thā

tumhāre shahr kī saḌkeñ bhī bārish dho ga.ī hogī
hamāre gaañv kī galiyoñ meñ to sabza nikal aayā