Tags-Barish

paanī kī pesh-raft ne sūkhā bhagā diyā
bārish ke ba.ad ghaas kī TukḌī lahak uThī

ek sukūt thā tārīkī thī vaqt kī Thahrī saañs
miTTī ne bārish dekhī thī peḌ ne dekhe ḳhvāb

bārish kī būñdoñ se ban meñ tan meñ ek bahār aa.ī
ghar ghar gaa.e giit gagan ne gaūñjīñ galiyāñ gaañv kī

khīñch legā abr se bārish agar sabza huā
tū kisī kī chaah meñ be-kār saudā.ī na ho

achchhā maiñ haarā tum jiite aage kī ik baat suno
ab ke baras jab bārish hogī soch samajh kar bhīgeñge

bārish hogī to bārish meñ donoñ mil kar bhīgeñge
ret pe ek musāfir kā ghar aur samundar bhīgeñge

us din kī jab bārish hogī kaun bachegā ham-safaro
phuul parind charāġh jazīre kañkar patthar bhīgeñge

kāġhaz kī ik kashtī le kar bārish meñ kyuuñ nikle ho
bhūle-bisre bachpan kī yādoñ ke paikar bhīgeñge

sochtā huuñ ki vo insān ba-nām-e-hastī
kaise añgāroñ kī bārish meñ nahāyā hogā

havā badlī ghaTā chhā.ī vo bārish kā sahāb aayā
magar ab tak na ai pīr-e-muġhāñ daur-e-sharāb aayā

altāf-o-karam kī bārish bhī jo mujh pe kare sansār to kyā
jab us ne na pūchhā haal mirā daryāft kareñ aġhyār to kyā

ik aan meñ hī sab dar-o-dīvār dhul ga.e
bārish se shahr-bhar kā muqaddar badal gayā

us roz mausam-e-ḳhizāñ kī pahlī bārish huī
jab us ne mere dar se āḳhirī baar qadam nikālā

huī bārish-e-sañg us shahr meñ
hameñ bhī milā haqq-e-ham-sā.egī

gulshan-e-fikr pe 'anvar' hai girāñ-bār mizāj
sher kī bārish-e-ilhām ilāhī tauba

ab kī bārish meñ mirā naam chamak jā.egā
laakh tum ret kī tah meñ mirā katba rakh do

havā hai dhund hai aur tez bārish
pahāḌī hai zarā sā rāsta hai

hai bārish kī musalsal mehrbānī
mire sahrā meñ dariyā jī rahā hai

dar-o-dīvār pe shakleñ sī banāne aa.ī
phir ye bārish mirī tanhā.ī churāne aa.ī

shab-e-hijr ke kaheñ kyā alam nazar aa.e sub.h ko bahte yam
ki ba-josh-e-bārish-e-abr-e-ġham pe bañdhā sarishk kā taar thā