Tags-Bijli

ye ai sayyād rah rah kar chamaktī hai kahāñ bijlī
jahāñ merā nasheman thā vahīñ ma.alūm hotī hai

ek bijlī sī mirī āñkhoñ ke andar kaundī
aur irāda jo huā azm-e-safar se pahle

baam par kah aa.e jā kar āh-e-garm
baḌh ke bijlī se hai jaulānī mirī

ḳhvāb meñ bhī vahī añdherā hai
ḳhvāb meñ bhī nahīñ hai bijlī dost

zālim ḳhudā se Dar kahīñ bijlī na gir paḌe
mushkil bahut hai girnā agar āsmān kā

is taraf ik āshiyāne kī haqīqat khul ga.ī
us taraf ik shoḳh ko bijlī girānā aa gayā

jhalkī dikhā ke aur vo bijlī girā ga.e
achchhā kiyā ilaaj mire iztirāb kā

phir taḌap kar baar baar aatī hai bijlī kis liye
ek tinkā bhī to ab mere nasheman meñ nahīñ

vo bijlī haiñ to hoñ un ko mubārak
mujhe kis vāste taḌpā rahe haiñ

tuur bijlī kī javāñ-sāl kaḌak
nuur kī reshmīñ kilkārī hai

paanī meñ bijlī kā ghar thā
patthar meñ chiñgārī chhupī thī

ruḳhsār ke partav se bijlī kī na.ī dhaj hai
kyuuñ aañkh jhapaktī hai kyā sāmne sūraj hai

bijlī kā qumquma na ho kaalā dhuāñ to ho
ye bhī agar nahīñ ho to bujh jaanā chāhiye

guzār dete haiñ umreñ vo ghup-añdheroñ meñ
laTak rahe haiñ jo bijlī ke ūñche khamboñ se

ye kaun sā insāf hai ai arsh-nashīno
bijlī jo tumhārī hai to ḳhirman hai hamārā

ghaTā hai ghanghor raat kaalī fazā meñ bijlī chamak rahī hai
milan kā siina ubhār par hai birah kī chhātī dhaḌak rahī hai

haañ us ne jhalkī dikhlā.ī ek hī pal ko darīche meñ
jaano ik bijlī lahrā.ī aalam ek shahīd huā

dast-e-dushman se tiir kyā chhūTā
ek bijlī kamān se TuuTī

diye to bujh ga.e bijlī ke qumqume na bujhe
havā ko zor pe apne gumān kitnā thā

kalīm-e-tūr ye kyuuñ tuur par girī bijlī
nigāh-e-nāz ko kyā koī bā-vafā na milā