Tags-Bijli

qafas kī tīliyoñ meñ jaane kyā tarkīb rakkhī hai
ki har bijlī qarīb-e-āshiyāñ ma.alūm hotī hai

abhī baaqī haiñ pattoñ par jale tinkoñ kī tahrīreñ
ye vo tārīḳh hai bijlī girī thī jab gulistāñ par

bijlī chamke to bahāne se lipaT jaate haiñ
phir vo kahte haiñ baḌī sharm-o-hayā se tauba

phir na tūfān uTheñge na giregī bijlī
ye havādis haiñ ġharīboñ hī ke miT jaane tak

zamīñ se āsmāñ tak merī betābī kā charchā hai
sabaq letī hai bijlī aa ke mere qalb-e-bismil se

nikal aayā vo ghabrā kar dil us kā is qadar dhaḌkā
sadā bijlī kī dī naale ne jab muñh se mire kaḌkā

na jānūñ ishq kī bijlī kidhar siiñ aa.ī hai
ki mujh jigar ke khule kuuñ jalā tamām kiyā

bijlī kī chamak meñ sho.ale haiñ phūloñ kī hañsī meñ aañsū haiñ
ye 'fazl' vafā kī duniyā hai phir bhī to vafā kā naam nahīñ

ab yaad nasheman hai na bijlī kī jafā yaad
nikle the kuchh aise ki chaman tak na rahā yaad

motor ke pahiye bijlī ke khambe pe chand chhīñTe kuchh
chiknī saḌak pe duur tak ik surḳh sī lakīr

mab.hūt se khaḌe rahe sab bas kī line meñ
kūlhe uchhāltī huī bijlī guzar ga.ī

haiñ sirf kahne ko bijlī ke qumqume raushan
har ek samt añdherā dikhā.ī detā hai

kaash bijlī koī chamke koī bādal barse
aaj kī shaam zamīnoñ pe bahut bhārī hai

haiñ us kī tarah sard ye bijlī ke sutūñ bhī
raushan haiñ magar aag kahāñ dil meñ lagī hai

ik barq-e-tapāñ kauñde bijlī sī chamke jaa.e
is āriz-e-rañgīñ se parda jo sarak jaa.e

kyā mazā detī hai bijlī kī chamak mujh ko 'riyāz'
mujh se lipTe haiñ mire naam se Darne vaale

na to sayyād hai na kunj-e-qafas
kahīñ bijlī meñ abr-e-tar se gire

hilī zabān ki bijlī hai phir fuġhāñ merī
ḳhudā kare na qafas meñ khule zabāñ merī

is shahr meñ ik laḌkī bilkul hai ġhazal jaisī
bijlī sī ghaTāoñ meñ ḳhushbū sī adāoñ meñ

hai āsmān tak tire giryāñ kā maz.haka
bijlī bhī rote dekh ke hañstī chalī ga.ī