Tags-Bijli

ġham ne bijlī banā diyā dil ko
imtihān-e-sukūñ hai be-ma.anī

aate hī javānī ke lī husn ne añgḌā.ī
is samt girī bijlī us samt qazā aa.ī

kyuuñ chamak uThtī hai bijlī baar baar
ai sitamgar le na añgḌā.ī bahut

mire nasheman meñ shān-e-qudrat ke saare asbāb haiñ muhayyā
havā safā.ī pe hai muqarrar charāġh bijlī jalā rahī hai

kyuuñ chamak uThtī hai bijlī baar baar
ai sitamgar le na añgḌā.ī bahut

bijlī sab par girtī hai
merā hī ghar hai to kyā

bijlī huuñ nazar koh o bayābāñ pe hai merī
mere liye shāyāñ ḳhas-o-ḳhāshāk nahīñ hai

kabhī kabhī bijlī hañstī thī
kahīñ kahīñ chhīñTā paḌtā thā

mirī rag rag meñ yuuñ to dauḌtī hai ishq kī bijlī
kahīñ zāhir nahīñ hotī kahīñ mālūm hotī hai

andhe ghar meñ har jānib se bad-rūhoñ kī yūrish thī
bijlī jalne se pahle tak vo sab thiiñ maiñ tanhā thā

load-shedding kī shikāyat pe dolattī maare
log bijlī ke minister ko gadhā kahte haiñ

ātish-nafs havā hai gulzār kī hamāre
bijlī girī hai ġhunche jab muskurā diye haiñ

udhar āsmāñ par chamaktī hai bijlī
mukammal idhar āshiyāñ ho rahā hai

ye bijlī hai ki ai abr-e-shab-e-hijr
hai dhajjī ek dāmān-e-sahar kī

gale lipaTne meñ yuuñ shitābī ki misl bijlī ke iztirābī
kahīñ jo chamkā chamak chamak kar kahīñ jo lapkā to phir jhapākā

nazar ke sāmne kaundī thī ek bijlī sī
mujhe batāo ḳhudā-rā ki ab kahāñ huuñ maiñ

vo kaalī ghaTā aur vo bijlī kā chamaknā
vo meñh kī bauchhāḌeñ vo barsāt kā aalam

shāyad paḌos meñ kahīñ bijlī girī hai aaj
dekho hamāre ghar meñ añdherā nahīñ rahā

ab mujhe gulshan se kyā jab zer-e-dām aa hī gayā
ik nasheman thā so vo bijlī ke kaam aa hī gayā

taḌpā maiñ ḳhaak par to kiyā charḳh ne karam
bijlī girā.ī mere bichhaune ke vāste