Tags-Bijli

zindagī karnā vo mushkil fan hai 'ash.har' hāshmī
jaise ki chalnā paḌe bijlī ke nañge taar par

shāyad maiñ dar-ḳhur nigah-e-garm bhī nahīñ
bijlī taḌap rahī hai mire āshiyāñ se duur

khapī hai dil meñ hañsī tumhārī firāq meñ kauñdtī hai bijlī
raheñ na kyuuñ ashk-e-surḳh jaarī jigar meñ almās kī kanī hai

maiñ ghaTāoñ se ḳhud ko bachātī rahī
teġh bijlī kī sar pe laTaktī rahī

bijlī girī thī kab ye kisī ko ḳhabar nahīñ
ab tak chaman meñ aag lagī hai bahār meñ

ashk-e-bārāñ aah bijlī ashk kī kaalī ghaTā
māh-rū ban kis tarah kā barshgālā ho gayā

yuuñ naqāb-e-ruḳh-e-zebā bhī uThā dī kis ne
ḳhirman-e-dil pe ye bijlī sī girā dī kis ne

aaj bhī zehan meñ bijlī sī chamak uThtī hai
kaun bholā hai tujhe kis ne bhulāyā hai tujhe

bijlī chamkī to abr royā
yaad aa ga.ī kyā hañsī kisī kī

zabt-e-nāla se aaj kaam liyā
girtī bijlī ko maiñ ne thaam liyā

kahāñ bijlī meñ ye betābiyāñ thiiñ
dil-e-muztar kī parchhā.īñ paḌī hai

abr kī tah meñ bijlī chamkī us kā tabassum thā magar aur
lafzoñ meñ pahchān na paa.e thī jo baat ishāre kī

vo merī jur.atoñ par be-niyāzī kī sazā denā
havas kī zulmatoñ par naaz kī bijlī girā denā

nasīm-e-sub.h se kyā TūTtā ḳhvāb-e-girāñ apnā
koī nādān bijlī chhū ga.ī hai āshiyāñ apnā

Dhake rahte haiñ gahre abr meñ bātin ke sab manzar
kabhī ik lahza-e-idrāk bijlī sā kaḌaktā hai

'soz' hamāre ba.ad jahāñ ko yaad hamārī aa.egī
ḳhasta diloñ kī āh-o-bukā ko bijlī kaun bānegā

ik lakīr bijlī kī
aur rahguzar raushan

be-ḳhayālī meñ gir paḌī hogī
vo nahīñ jāntī vo bijlī hai

havā meñ jab uḌā parda to ik bijlī sī kaundī thī
ḳhudā jaane tumhārā partav-e-ruḳhsār thā kyā thā

lapak us kī chamak us kī vahī dam-ḳham vahī aalam
ye bijlī koī āh-e-ātishīñ ma.alūm hotī hai