Tags-Bijli

bijlī kaḌkī bādal garjā maiñ ḳhāmosh rahā
is kohrām meñ bhī ai duniyā maiñ ḳhāmosh rahā

chaḌhtī huī naddī hai ki lahrātī hai
pighlī huī bijlī hai ki bal khātī hai

zulmāt ke jhurmuT vaise to bijlī kī chamak se Darte haiñ
par baat agar kuchh baḌh jaa.e tāroñ se subū Takrā denā

āñdhī aa.e bijlī kaḌke kaalī ghaTā.eñ chhāne lageñ
majbūran vo ruke mire ghar itnī bārish ho jaa.e

us rū-e-ziyā-bār pe ye abr kā ghūñgaT
bijlī ko yaqīnan ye hayā tujh se milī hai

kabhī bārish kī bhī rātoñ meñ na chamkī bijlī
yahī armān rahā ghar ko munavvar dekheñ

bijlī girī hai kal kisī ujḌe makān par
rone lagūñ ki hañs paḌūñ is dāstān par

ātish o nuur se bijlī ke raheñ kyuuñ mahrūm
ham sar-e-dasht nayā ghar to banā sakte haiñ

ai dost chashm-e-shauq ne dekhā hai bār-hā
bijlī se terā naam ghaTā par likhā huā

abr-e-rahmat se to mahrūm rahī kisht mirī
koī bijlī hī falak tū ne girā.ī hotī

bijlī tire jalvoñ kī gir jaa.e kabhī mujh par
ai jaan mirī hastī is aag meñ jal jaa.e

kabhī bijlī taḌpī kabhī āñdhī aa.ī
baḌhe dushman-e-āshiyāñ kaise kaise

girtī bijlī jaltā nasheman hañste log
mere patthar mere gul-e-tar tere naam

na kar afrañg kā andāza us kī tābnākī se
ki bijlī ke charāġhoñ se hai is jauhar kī barrāqī

kuchh āñkhoñ meñ to ho gayā ābād vo chehra
kuchh bastiyoñ meñ aaj bhī bijlī nahīñ aa.ī

zabt-e-nāla se aaj kaam liyā
girtī bijlī ko maiñ ne thaam liyā

ḳhirman-e-sabr ko bijlī ne jalāyā gir kar
jab kabhī dil kī tamannāoñ se uljhā sāvan

huī bijlī se kis din naql andāz-e-sitamgārī
tumhārī tarah sīkhā laakh us ne muskurā denā

ik bijlī kī kauñd ham ne dekhī
aur log kaheñ haiñ vo dahan thā

kis kī āñkheñ tohmat-e-lams uThāeñgī
bijlī ke tan meñ haiñ kis ke rañg bhare