Tags-Aaina

vo bhī tasvīr sā āġhāz-e-mohabbat meñ rahā
maiñ bhī thā ā.īna-ḳhānoñ kī sī hairānī meñ

kyuuñ ā.īna baar baar dekhūñ
maiñ aaj nahīñ jo kal rahā huuñ

hai tamāshā.iyoñ kā jamm-e-ġhafīr
aks bhī ā.īna-ḳhānoñ meñ nahīñ

tum mujhe dekh ke jo baat kabhī kah na sake
kyā ye mumkin nahīñ ā.īna batā de mujh ko

parde meñ agar us ke mirā dil nahīñ hotā
ā.īna ruḳh-e-yār ke qābil nahīñ hotā

hisār-e-zāt hai yā koī ā.īna-ḳhāna
na is qadar bhī hameñ ḳhud-pasand honā thā

ab to un āñkhoñ ke aage ā.īna hai aur maiñ huuñ
haa.e mizhgāñ kholne se pahle kyā kyā sāmne thā

tirī mohabbat meñ mere chehre se hai numāyāñ jalāl terā
huuñ tere jalvoñ meñ mahv aisā ki terā ā.īna-dār huuñ maiñ

donoñ jānib hai barābar tirī tasvīr kā ruḳh
ā.īna merī tarah dañg nazar aatā hai

ā.īna us ko dekh ke mab.hūt ho gayā
gul-dān meñ gulāb lajā kar simaT ga.e

sabhī ne ā.īna dekhā abhī musallam thā
tirī nigāh paḌī aur paara paara huā

misl-e-ā.īna aabrū hai to dekh
varna ghar meñ to apne ḳhaak nahīñ

hairat ne kiyā hai yak jahāñ kā
juuñ ā.īna rū-shanās mujh ko

apnā har andāz āñkhoñ ko tar-o-tāza lagā
kitne din ke ba.ad mujh ko ā.īna achchhā lagā

lā sakā nazzāra-e-ruḳhsār-e-raushan kī na taab
jā ke ā.īne pe chehre kī ziyā ulTī phirī

ā.īna dekhūñ to kyuuñ tū hī nazar aa.e mujhe
boltā hai kyā tirā chehra mere jaisā na thā

ye ḳhat hai jauhar-e-ā.īna-rāz
ise mushk-e-ḳhutan kahnā bajā hai

ek ā.īna rū-ba-rū hai abhī
us kī ḳhushbū se guftugū hai abhī

chamakte rañg khile naqsh ā.īna chehre
to aaj naqsh-e-nazar par ye baar kis kā hai

kaun karegā sūrat saiqal
zañg lagā ik ā.īna huuñ