Tags-Bisaat

shab-e-visāl hai bisāt-e-hijr hī ulaT ga.ī
to phir kabhī ḳhayāl-e-māh-o-sāl bhī na aa.egā

charāġh-e-zindagī hai yā bisāt-e-ātish-e-rafta
jalā kar raushnī dahlīz-e-jāñ par sochte rahnā

bichhā.ī hai jo kahīñ ishq ne bisāt apnī
kiyā hai us ne faqīroñ ko vāris-e-parvez

bisāt-e-ishq-bāzī meñ mirā dil
matā-e-sabr-o-naqd-o-hosh haarā

yārān-e-be-bisāt ki har bāzī-e-hayāt
khele baġhair haar ga.e maat ho ga.ī

izn hañgāma-e-nigāh na de
kyā hamārī bisāt aur ham kyā

hai kā.enāt mire dil kī dhaḌkanoñ meñ asiir
maiñ ek zarra bisāt-e-nizām-e-shamsī par

thā na juz ġham bisāt-e-āshiq meñ
ġham ko rāhat-fazā kiyā tū ne

ḳhirad kī raah meñ har moḌ par dhoke nikal aa.e
bisāt-e-amn par bhī jañg ke naqshe nikal aa.e

jo ulaT chuke haiñ bisāt-e-dahr ko agle vaqtoñ meñ bārhā
vahī aaj gardish-e-baḳht hai vahī rañg-e-daur-e-qamar bhī hai

haiñ bas-ki josh-e-bāda se shīshe uchhal rahe
har gosha-e-bisāt hai sar shīsha-bāz kā

ma.alūm thā ki vahshateñ apnī bisāt haiñ
ma.alūm thā ki shaam kā taara bhī the hamīñ

saje hue haiñ piyāda o asp o fiil tamām
bichhī huī hai bisāt-e-jahāñ kahāñ gayā maiñ

nāz-bardār-e-hunar ho ga.e ruḳhsat kab ke
ab bisāt-e-suḳhan-o-naġhma-o-ash.ār uThā

ukhaḌ ga.ī haiñ tanābeñ sitam ke ḳhemoñ kī
ulaT ga.ī hai bisāt-e-hasab-nasab kab se

bisāt-e-dahr pe āsāñ nahīñ hai kuchh 'hirmāñ'
tirī nigāh ke aalam se āshnā honā

dariyā kī kyā bisāt ki mujh ko Dubo sake
kashtī kahīñ kahīñ mirī Dolī hī kyuuñ na ho

haq par jo hai vahī sar o shāna buland hai
hai varna be-bisāt vo Tolī hī kyuuñ na ho

bisāt dil kī bhalā kyā nigāh-e-yār meñ hai
ye shīsha TuuT bhī jaa.e to kis shumār meñ hai

koh-e-girāñ ke sāmne shīshe kī kyā bisāt
ahd-e-junūñ meñ saarī sharārat lahū kī thī