Tags-Bisaat

phir aaj gardish-e-daurāñ se maat khaa.ī hai
bisāt-e-dil hī ulaT do ki hausla kam hai

bisāt-e-ishq pe baḌhnā kise nahīñ aatā
ye aur baat ki bachne ke ghar nahīñ aate

aur bedār chal ki ye duniyā
shātiroñ kī bisāt hai ai dil

maiñ bisāt-e-dānish kā duur se tamāshā.ī
dekhtā rahā shātir kaise chaal chaltā hai

ham bisāt-e-tamannā bichhāte rahe
aate aate vo aate rahe rāt-bhar

tah kar chuke bisāt-e-ġham-o-fikr-e-rozgār
tab ḳhānqāh-e-ishq-o-mohabbat meñ aa.e haiñ

tumhārī shaan hamārī bisāt kyā hai yahāñ
shikoh-e-ḳhusrav-e-ḳhāqān ek raat kā hai

hazār hāthoñ se maiñ ne jis ko sambhāl rakkhā thā zindagī meñ
charāġh-bar-kaf bisāt-e-dil par khaḌī huī hai vo shaam kahnā

ġhamoñ kī raah meñ sābit-qadam haiñ dīvāne
bisāt-e-aish pe kitne nashāt-e-kār gire

ye dayār-e-shīsha-farosh hai yahāñ ā.īnoñ kī bisāt kyā
yahāñ is tarah se rakho qadam ki fareb meñ bhī yaqīn ho

phuul barsā.eñ bisāt aish par
rose vasl yaar kī bāteñ kareñ

dil kī bisāt kyā thī nigāh-e-jamāl meñ
ik ā.īna thā TuuT gayā dekh-bhāl meñ

mohabbat meñ visāl-o-hijr kī tam.īz kyā ma.anī
bisāt-e-ishq par bāzīcha-e-sūd-o-ziyāñ kyuuñ ho

ye kā.enāt mire sāmne hai misl-e-bisāt
kahīñ junūñ meñ ulaT duuñ na is jahān ko maiñ

yahī bisāt agar hai to ek roz 'faroġh'
jo ham se jiit chukā hai vo ham se hāregā

bisāt ulaTtī hai shab kī sitāre bujhte haiñ
charāġh gul karo sūraj tulūa hotā hai

lagī thī jaan kī baazī bisāt ulaT Daalī
ye khel bhī hameñ yāroñ ne hārne na diyā

purāne ġham tire to juzv-e-jāñ ham ne banā Daale
bisāt-e-dil kī ḳhvāhish hai na.e ġham kā utārā ho

kyā shām-e-ġham meñ dīda-o-dil par guzar ga.ī
un taaza vārdān-e-bisāt-e-kuhan se pūchh