Tags-Chaand

lafzoñ kī narmiyoñ se khulā chāñd is tarah
kartī huuñ us kī raushnī mahsūs aaj tak

chāñd kī tarh ka.ī daaġh haiñ peshānī par
maut ke sāmne mahtāb hai chehrā apnā

bas ik tum hī nahīñ manzar meñ varna kyā nahīñ hai
surāhī chāñd taare titliyāñ jugnū parinde

apne diye ko chāñd batāne ke vāste
bastī kā har charāġh bujhānā paḌā hameñ

ik chāñd ro rahā thā sar-e-āsmān-e-ishq
tāroñ kī anjuman meñ koī chāragar na thā

ye chāñd aur sitāre to ik bahāna haiñ
kuchh aur hai jo yahāñ jagmagāne vaalā hai

kar sakā hai gadlā kaun raushnī ke chashme ko
chāñd bujh nahīñ jaatā āñdhiyoñ ke chalne se

chāñd ko dekh ke chhat par 'anjum'
saaya dīvār se niklā hogā

kyuuñ merī tarah rātoñ ko rahtā hai pareshāñ
ai chāñd batā kis se tirī aañkh laḌī hai

ye zid hai yaad harīfān-e-bāda-paimā kī
ki shab ko chāñd na nikle na din ko abr aa.e

us kī ek uñglī par ghūmtī rahī duniyā
chāñd kī tarah har shai duur ho ga.ī ham se

chāñd nikle kisī jānib tirī zebā.ī kā
rañg badle kisī sūrat shab-e-tanhā.ī kā

ye pahlī nazm un āñkhoñ kī ḳhātir hai
ki jin meñ chāñd tāroñ sī chamaktī shāh-rāhoñ par hazāroñ an-kahe jazbe hayā kī surḳh hiddat se pighalte haiñ

hai mire pesh-e-nazar chāñd sī sūrat terī
gul khilā.egī kisī roz mohabbat terī

chakorī dekh le tū bhuul jaa.e chāñd ko taknā
dil-e-muztar ko jo taskīn kaale til se miltī hai

be-ḳhvāb nigāhoñ ke ufaq par jo āchānak
dhundlā sā koī chāñd ubhar aa.e to kyā ho

aks be-naqsh hue aa.ine dhundlāne lage
dard kā chāñd sar-e-bām-e-tamannā chamkā

guloñ sā chāñd sā tāroñ sā ham bhī shor karte the
ki kis darja mohabbat ham ne sar pe hī uThā lī thī

is birhā ke chāñd kī sūrat ham bhī 'tarīr'
raat ko katba ban sakte the nahīñ bane

gardish-e-vaqt kā kitnā baḌā ehsāñ hai ki aaj
ye zamīñ chāñd se behtar nazar aatī hai hameñ