Tags-Chaand

zulmat se mānūs haiñ āñkheñ chāñd ubhrā to muñd jā.eñgī
bāloñ ko uljhā rahne do ik uljhāv sau suljhāv

pūchho zarā ye chāñd se kaise sahar huī
itnī tavīl raat bhī kaise basar huī

vahshat usī se phir bhī vahī yaar dekhnā
pāgal ko jaise chāñd kā dīdār dekhnā

abhī tak yaad hai kal kī shab-e-ġham aur tanhā.ī
phir is par chāñd kā Dhalnā 'qamar' āhista āhista

justujū kho.e huoñ kī umr bhar karte rahe
chāñd ke hamrāh ham har shab safar karte rahe

chāñd phīkī sī hañsī hañs ke guzar jaatā hai
Daal dete haiñ sitāre dhulī chādar apnī

āñganoñ meñ phuul the mahke hue
khiḌkiyoñ meñ chāñd thā Thahrā huā

vo lamha ek chāñd thā mahaktī raat kā
vo chāñd bujh sakā na thā ki raat kaT ga.ī

chāñd tāroñ kī muñdī thiiñ āñkheñ
thā kahāñ mehr-e-mubīñ yaad nahīñ

zamīñ par chāñd aanā chāhtā hai
utar kar kashti-e-āb-e-ravāñ se

tere muñh par terī ham ne kabhī na kī tārīf zarā
likhne baiThe to kāġhaz par rakh diye chāñd sitāre haiñ

ḳhvāhishoñ kī maut kā yaaro bhalā chāhā karo
phailtī tārīkiyoñ meñ chāñd kā charchā karo

kahīñ chāñd jugnū parinda rut kahīñ rañg dhuup dhanak nirt
mire daur meñ dil-e-muztarib ye ġhazal kī shīshagarī rahī

chāñd ho to kākul kī lahr aur chaḌhtī hai
raat aur ghaTtī hai baat aur baḌhtī hai

jañg se jale duniyā chāñd ko chale pāgal
aañkh par gire bijlī kaan meñ paḌe kājal

raat aur itnī musalsal kisī dīvāne ne
sub.h rokī huī hai chāñd churāyā huā hai

nūr-e-aflāk se raushan ho shab-e-ġham ki na ho
chāñd tāroñ se mirā naama o paiġhām to hai

chāñd ḳhud mahv-e-tamāshā thā falak par us dam
jab sitāroñ ne utārīñ thiiñ balā.eñ terī

raushnī kī jañg meñ tārīkiyāñ paidā huiiñ
chāñd pāgal ho gayā taare bhikārī ho ga.e

jis tarah chāñd par ho abr-e-siyāh
zulf yuuñ mukhḌe par rahī hai ulaT