Tags-Chaand

har lamha chāñd chāñd nikharnā paḌā mujhe
milnā thā is liye bhī sañvarnā paḌā mujhe

chāñd niklā to mire pahlū meñ
terī ḳhvābīda mohabbat jaagī

ye kaun log añdheroñ kī baat karte haiñ
abhī to chāñd tirī yaad ke Dhale bhī nahīñ

raat ke shāyad ek baje haiñ
sotā hogā merā chāñd

īstāda the sitāre tirī dahlīz ke saath
chāñd be-chain thā āñgan meñ utarne ke liye

chāñd aaj kī raat nahīñ niklā
vo apne lihāfoñ ke andar chehre ko chhupā.e baiThā hai

chāñd hai paanī meñ yā bhūle hue chehre kā aks
sāhil-e-dariyā pe dekho maiñ bhī hairānī meñ huuñ

shab ke hāthoñ girā aur kahīñ rah gayā
chāñd phir be-falak be-zamīñ rah gayā

ik chāñd salīb-e-shāḳh-e-gul par
baalī kī tarah laTak rahā hai

shoḳh rātoñ ke liye mere ta.āqub meñ na aa
dard kā chāñd huuñ ḳhvāboñ meñ nazar aayā huuñ

ghabrā.eñ havādis se kyā ham jiine ke sahāre nikleñge
Dūbegā agar ye sūraj bhī to chāñd sitāre nikleñge

raat Thahrī huī thī aur fazā thī gum-sum
chāñd bhī baam se utrā to na thā aa jaate

mirī guḌiyā kisī din chāñd par shādī rachā.egī
zamīñ ke to sabhī guDDe nazar aate haiñ ab buDDhe

chāñd agar puurā chamke to us ke daaġh khaTakte haiñ
ek na ek burā.ī tai hai saare izzat-dāroñ meñ

paanī meñ talātum bhī usī chāñd ke baa.is
aur apnī adā dekh ke hairāñ bhī vahī hai

is shahr-e-be-charāġh meñ chehra vo chāñd sā
aa.e jo apne sāmne kaisā dikhā.ī de

'asad' ghaTā.eñ ye tīrgī kī tabhī chhaTeñgī ki jab falak par
kisī ke māthe kā chāñd chamke kisī nazar kā shahāb TuuTe

aan rahā koThe ke uupar chalte chalte
khoyā khoyā chāñd hamārā dhīre dhīre

ḳhushbū-e-vasl tavajjoh kā vo aalam vo ḳhulūs
Dūbte chāñd kī āġhosh meñ kyā kuchh na rahā

is chāñd se chehre ko dikhā kyuuñ nahīñ dete
hasrat ye mire dil kī miTā kyuuñ nahīñ dete