Tags-Chaand

jaltā hai mire dil meñ paḌā daaġh kī sūrat
jo chāñd sar-e-arsh nikalne ke liye thā

jaise har shai ho kisī ḳhvāb-e-farāmosh meñ gum
chāñd chamkā na kisī yaad ne badlā pahlū

zard sūraj kī mash.al bhī kajlā ga.ī chāñd tāroñ ko bhī niiñd sī aa ga.ī
ab kisī ko agar raushnī chāhiye apnī palkoñ pe sham.eñ jalā kar chale

ek muddat se maiñ baiThī huuñ yahī aas liye
chāñd āñgan meñ mire kis liye utrā hī nahīñ

jaane vaale hamārī mahfil se
chāñd tāroñ ko saath letā jā

tum falak par chāñd ban kar raushnī dete rahe
maiñ mahaktī sī tumhārī rāt-rānī rah ga.ī

aa.e haiñ phuul dhuup se bachne mirī taraf
merā hī dil hai chāñd jahāñ mehmāñ hue

chāñd yuuñ shāḳhoñ meñ uljhā hī na rahtā kal raat
'ashk' vo shaḳhs agar paas hī baiThā hotā

maiñ DhūñDhtā phirtā huuñ jise bām-e-falak par
vo chāñd sar-e-halqa-e-ahbāb hai raushan

jurra-e-āḳhir-e-mai hai ki girāñ-ḳhvābī-e-shab
chāñd sā Duub rahā hai mire andar koī

yā sar-e-rāh kabhī TuuT ke taare barse
yā kisī chāñd kā bujhtā huā saaya guzrā

raushnī ke sāz-o-sāmāñ DhūñDhtā phirtā thā maiñ
un dinoñ ik chāñd kī ta.amīr meñ uljhā thā maiñ

vo puurā chāñd thā lekin hamesha
galī meñ adh-khulī khiḌkī se jhāñkā

maiñ to dauḌā huuñ ḳhud apne hī ta.āqub meñ 'farīd'
chāñd kyuuñ bhaag paḌā hai mire pīchhe pīchhe

ehsās-e-ishq dil kī panāhoñ meñ aa gayā
bādal simaT ke chāñd kī bāhoñ meñ aa gayā

jin ke dāman pe kabhī chāñd-sitāre chamke
dafan un kā bhī fasāna hai isī miTTī meñ

us ne bhī to hai vaqt kī gardish ko sañvārā
'aḳhtar' se ka.ī chāñd zamāne meñ lage haiñ

kabhī to āsmāñ se chāñd utre jaam ho jaa.e
tumhāre naam kī ik ḳhūb-sūrat shaam ho jaa.e

vo din kahāñ ki us ko sar-e-shām dekh luuñ
pichhle pahar kā chāñd muqaddar lagā mujhe

ye kyā sabab jo idhar chāñdnī nahīñ aatī
ḳhudā ne chāñd banāyā hai sab ke ghar ke liye